【記者黃婉儀報道】中年肥賊專攻港島「一人店舖」，覷準僅得一名店員一腳踢的弱點，藉詞購物誘開店員入倉取貨，令舖面真空，賊人乘機偷去店員的個人財物，甚至盜去無鎖收銀機內的金錢，每次涉款數千元，今年首四個月已有18宗同類盜竊案，其中荷李活道是重災區。警方計劃向各店舖派發肥賊拼圖，並提醒店員將個人財物妥善放好。
首四月案件激增五倍
肥賊年約40歲，本地人，短髮、身材肥胖、身高五呎六吋，活躍於上環荷李活道、樂古道，灣仔及北角英皇道一帶。除了該肥賊外，另一夥高矮兩賊亦以相同手法犯案。警方稱，去年1至4月一人店舖盜竊案僅三宗，今年至4月23日已激增五倍至18宗，平均每周便有一宗，警方估計18宗案件有三分一與肥賊有關。
港島總區防止罪案辦公室主任蔣瑞菁指出，近期港島區雜項盜竊案有上升趨勢，獨行肥賊覬覦一人看舖的小型店舖，如規模較小的時裝店、建築材料店、古董店，採用聲東擊西手法，一邊假裝睇貨，一邊分散店員注意力，「賊人會猛問店員件衫有乜顏色、尺碼，如果舖面冇，就會叫店員入倉攞貨，舖面冇人，就乘機偷咗店員嘅個人財物，甚至有啲冇手尾嘅店員，唔記得鎖好收銀機就行入去，個賊連收銀機入面嘅錢都偷埋！」賊人偷去店員的手機、整個手袋或公事包，每次涉款4,000至5,000元。
其中一宗是肥賊到上環荷李活道一間古董店假裝選購古董，「佢喺度左睇右睇，表現得好有誠意，仲叫個店員入去貨倉攞個古董花樽畀佢睇，吼個店員入咗去，就即刻偷走佢個公事包！」
一條街四分三舖中招
同街一間古董店老闆說，上周三其胞妹一人看舖中招，當日中午12時許，他外出午膳，店裏獨剩妹妹，「首先一個男人入嚟睇貨，我個妹已經話得一個人看舖唔做生意，點知另一個賊好快竄入舖，一分鐘內拎走我妹妹個手袋！」老闆形容賊人手法專業，探員並向他透露，整條街有四分三店舖中招，呼籲店員要提高警覺。
另一古董店職員李小姐表示，她亦遇過兩高矮賊聲東擊西，用1,000元找續結果騙去數千元。現時有商戶在飾櫃貼上警署電話或警方滅罪單張，希望令賊人知難而退。
肥賊攻陷一人舖示意圖
