若果跟住潮流走嘅叫潮人，咁00年喺創業板上市嘅亞科資本（8088），就可以稱之為潮「公司」，事關佢哋上市之初，乘住科網熱，個英文名都用「Tech」行頭（叫Techpacific）；之後見到天然氣好景，就轉咗去做天然氣；而最新嘅搞作，就係轉做呢輪好興嘅資產管理，總之興邊瓣佢哋就搞邊瓣，為表決心，今勻連個名都改埋，叫做「高誠資本有限公司」。
老實講，間公司做乜，華華興趣唔係好大，但係對於佢哋位主席IlyasTariqKhan同埋行政總裁陳覺忠嘅高薪，就非常有興趣，皆因兩個嘅人工，06年冠絕創業板，分別有9207.12萬及6136.26萬銀，07年雖則大幅減咗一半以上，但兩人嘅薪水都仲有3023.28萬及2444.52萬銀，真係勁過唔少大企業高層！華華問陳覺忠，公司股價長年插水，但佢人工咁鬼高，有冇股東詐型，佢好大方咁話:「梗係有啦！」咁來年係咪要再減人工嚟回應股東呢？
再問佢覺得自己值唔值拎咁多薪水？佢好堅定咁話:「梗係值喇！」淨係幫公司拎到IBDaiwa嘅低成本認股權證，都已經值回票價喇！