劉德華昨日到九龍灣出席演唱會藍光碟（Blu-ray）簽名活動，吸引數百人潮逼爆商場，場面墟冚。對於湯鎮業早前大爆華仔一直和朱麗倩一起，華仔笑說：「我會勸佢小心啲講！」對於有傳他會擔任奧運火炬手，華仔則謂跑200米毫無問題。
劉德華昨日到九龍灣MegaBox出席「劉德華帶你飛躍WONDERFULWORLDPS3高清時代」簽名會，吸引大批歌迷和數百市民圍觀。華仔甫出場就與三名小妹妹大跳拉丁舞搞熱鬧氣氛，之後又與兩個「囝囝」Andox和黑仔跳舞，令現場一片笑聲。
「私底下同佢講」
華仔在簽名會前接受記者訪問，對於湯鎮業早前在內地接受訪問時，大爆華仔一直和朱麗倩一起，又指他已過了適婚年齡，再耽擱下去會影響傳宗接代，叫他快點結婚，華仔聽後笑說：「我會勸佢小心啲講，呢啲事暫時唔想再談論，如果你哋有嘢要問，就問阿苗（苗僑偉）或者阿湯啦。」問到可會因此生氣時，華仔笑說：「我私底下會同佢講㗎嘞。」
有傳華仔將成為奧運火炬手之一，問他有何感受時，他多次反問記者說：「係咪真㗎？係咪真係㗎？咁今次唔係經商業贊助提名就更加有榮譽，我不嬲都有跑開步，200米OK冇問題，如果有人搞事都冇法，政府應該會保護好，話晒都經過咁多個地方。」至於運動員出身的方力申，一直表示希望成為火炬手之一，據知他應榜上有名。
敷面膜拍高清
華仔提到演唱會藍光碟甫推出即打破銷量紀錄，他笑說：「其實因為係新產品，要睇就要有番Blu-ray機先得，所以我哋出貨本來好保守，冇想像到銷量咁大。」
問到華仔以高清拍攝，對化妝要求相對提高，他坦言沒有壓力，他說：「其實唱完三首歌就等於冇化妝，同埋每日化妝師都幫我敷面膜起碼45分鐘。」
採訪：藍文浩 攝影：陳志嵐