𡃁界潮語（唔係潮州話，係潮流用語）日新月異，考試及評核局（HKEAA）忽然追上潮流，喺試題中玩潮語，點知錯漏百出𤓓到爆。會考噚日考中文科卷五「綜合能力考核」，試題錄音同參考資料夾雜大量潮語，相信係歷來最激試題。
呢段潮到爆試題錄音長約20分鐘，內容講述做新聞官嘅母親同做廣告嘅父親，同一對讀中學嘅仔女，討論潮語及外來語對中文嘅影響；一家人對話時大講潮語，包括勁熱、蒲點、閃、人氣、達人等字詞，細女更唱咗兩句Twins名曲《戀愛大過天》兩句歌詞：「怎麼閃，同學始終會遇見」，以示潮語好普及。
中文考試解錯「屈機」
𠵱家人人都玩MSN、SMS，各地教育界都面對俚語、俗語影響語言問題，考評局因應時勢出卷無可厚非，但卻冇做足功課；試題包括一個潮語解釋表，說明上述潮語含意，好似指「喪」有「極其」、「誇張」意思，不過卻將「屈機」誤解作「玩遊戲者因無法取勝而屈服」，唔少考生見到考評局知少少扮代表，當場喪笑。
八方出世得早，未試過考試咁有娛樂性，噚日考完試，學生喺網上熱論呢份「潮語試題」，好多人恥笑考評局，指該局自創例句：「見鬼勿Ｏ嘴，潛水怕屈機」最爆，以為有幾個潮語就係潮，其實冇人明。
本地潮語權威，非近期熱賣嘅一套《香港潮語學習字卡》作者蘇真真莫屬，八方請佢提供modelanswer指正考評局。佢指「屈機」最初係指打機時，個game有漏洞，令一方surewin，後來引申為兩人對壘時，因制度上有唔公平而令其中一方佔優，變成強弱懸殊，好似7呎6吋高嘅姚明，對住只有約6呎高嘅艾華遜，就係屈機嘞。
考生發起5.2黑衣應試
考評局錯解潮語隨時誤人子弟，八方建議當局禮聘「熊貓博士」復出，主持《潮語動畫廊》造福後學，否則考評局公信力不保，後果不堪設想。事實上今年好多考生不滿考評局，有考生投訴噚日考「潮語試題」時，其中一個試場放水，畀多15分鐘考生作答；日前考中文科閱讀理解時，MC題四個供選擇嘅答案又似是而非。考生不忿被玩殘，跟風創造新潮語：「做人別太HKEAA」。網上更有人發起5月2號考英文當日，舉行「絕望黑衣行動」，全港考生着黑衫入試場，向考評局無聲抗議。當日係聖火傳送好日子，10萬會考生怨氣冲天，考評局仲唔俾人屈機？
mailto:[email protected]