笑一笑，世界更美妙，影相當然要笑容，不過無人幫手揸機只靠自拍就好難兼顧。三星新推i8數碼相機就內置咗智能自拍功能，只要聽到嗶、嗶聲就知對啱自己塊面，笑一笑即可影到靚相。除攝影外，i8仲可以拍片、聽歌、睇片，甚至連世界指南都具備，實在係最強自拍王！
記者：許福合
攝影：王文忠
Model：Mandy
半邊臉無提示
巿面大部份數碼相機都有臉部對焦，自問其實就好少用，不過三星i8利用識別臉孔功能，從而提供進化版智能自拍感應系統。用過之後發覺實用好多，首先，啓動此功能後，當畫面出現一個完整臉孔時，相機就會出現嗶、嗶聲提示，當用家要自拍時就大約可知道畫面取景，而且可保證見晒自己個靚樣！自拍時可同時識別三張臉孔，幾個朋友仔一齊自拍都無問題；建議你配合埋倒數拍攝功能，毋須走來走去校啱位置先㩒機。當轉回正常拍攝狀態時，i8就能同時對焦九個臉孔，無論係拍個人或團體照，對焦可全交由相機包辦。
小測試
四色機身冧女
三星形容i8機身有如水晶，似唔似真係好見仁見智喇，不過筆者就幾鍾意有四種顏色可以選擇。除咗比較常見的黑色外，仲有白色、粉紅及粉藍色，個人推薦粉藍色，顏色比較罕見特別。當打開機身，會發覺鏡頭不用伸出，採用潛望鏡式鏡頭，可以有3倍光學變焦能力（相當於35mm相機38-114mm），配合830萬像素CCD，雖然唔算最頂級，不過作為潮人玩相、SnapShot就好夠用！而機背2.7吋顯示屏質素亦相當唔錯，尤其係陽光下欣賞都唔怕反光。
1GB拍片200分鐘
i8影相時可使用七種特別效果，為相片加入不同格調，如柔和、動感、自然、溫暖、清凉、寧靜及懷舊，用家亦可因應需要調校色澤、對比度，最正係可以預覽效果，啱晒鍾意「玩相」嘅玩家。攝錄影片亦係i8強項，能夠拍攝800×592（每秒20格）MPEG4，只要預備一張1GB記憶卡，就能夠拍足200分鐘影片，拍完後更可編輯影片，包括震動修正、擷取相片等。嚴格來講，i8應可叫做多媒體數碼相機，因為除咗拍攝功能外，仲隨時可變身成為音樂播放機，可下載影片、電子書隨時欣賞，功能齊全有如PMP。
Profile
感光元件：830萬像素CCD
變焦：3倍光學+5倍數碼
屏幕：2.7吋
ISO：80/100/200/400/800/1600/3200
記憶：SD/SDHC/MMC（內置256MB）
電源：專用電池
體積：90.7×58×19.9mm
重量：116g
售價：$2,190
查詢：SAMSUNG（36984698）
