市場上，大部份基金經理都係讀財務、精算出身，不過凡事都有例外，華華就識得一個持有理論物理學博士銜頭嘅專業投資人士。佢就係曾經管理盈富基金（2800）、A50中國指數基金（2823）同埋標智滬深300中國指數基金（2827）、現任中銀國際英國保誠資產管理量化投資董事鄧興成。
鄧興成93年修畢理論物理學，94、95年再做人類基因組中心博士研究員，但喺2000年考咗特許財務分析師（CFA）資格，輾轉做咗專業投資人士嘞，究竟點解？
鄧興成話，做投資管理得意過研究基因，加上打好「理性分析」嘅基本功，對圖表、波浪等股市分析特別有幫助，容易搵到定律。佢又話股市波動，投資ETF（交易所買賣基金）係一個唔錯選擇，可惜家陣未有一隻指數，或者一隻ETF具有代表性。言下之意，係咪中銀保誠會出番隻「具代表性嘅ETF」呢？佢笑笑口話：「熱切期待IdealIndex」出現，公司亦會繼續推出ETF產品喎！