法國名牌YSL前晚於海港城新店開幕，楊愛瑾（Miki）、模特兒姚書軼（Mikki）與李嘉慧都穿上YSL盛裝到賀，Miki說：「入行之後一年已經好鍾意呢個牌子，上季同今季好多星星圖案，好grand。」問到她是否愛收藏時裝，Miki說：「自己比較慳，鍾意實用嘢多，所以𠵱家最想係買樓，買衫方面，一季都會用幾萬至10萬不等，因為平時都有sponsor。」記者問她有何置業大計時，她說：「未，都要努力，因為自己想喺港島區買1,000呎嘅樓，如果同屋企人住就要2,000呎，離目標仲差好遠。」Miki還透露日前忙於拍葉念琛的新戲《親愛的》，她說：「第一次拍戲冇劇本，好似拍緊王家衛啲戲。」
李嘉慧陀B眼瞓
此外，李嘉慧懷有6個月的身孕，是夜穿了高跟鞋出席活動，她笑言：「由落車，行到間舖都係幾步路，唔緊要。」問到她陀BB的心情，她說：「陀呢胎成日都眼瞓，成日都要瞓晏覺，胎教就係同個大女一齊同BB傾偈，𠵱家佢冇jealous，不過就更加黐身，成日要我抱佢。」
採訪：梁錦雯 攝影：陳俊強
限量手袋寄到香港
YSL開店，怎能少得限量版手袋坐鎮？今次YSL就揀了Y-Mail系列，推出香港海港城限量版。Y-Mail袋用絲質羊皮物料，有tote、clutch及連帶的卡片套三款，而原有Y-Mail袋面壓上的法國總壇地址，限量版就改為新店的「YvesSaintLaurent HarbourCity HongKong」地址，加上壓印的郵票及郵戳，十足將手袋寄往香港！
