今年2月中，新地（016）老大郭炳湘突然休假，當時佢發聲明話「未來兩至三個月，有私人及海外公幹事務，將要到北京、美國及其他國家，料回港後會再履行現有職務。」數吓手指，已經過咗兩個幾月，都仲未有消息話佢已經返回工作崗位。
噚日新地旗下嘅西田百貨舉行改名儀式（以後叫做「一田」，唔係「西田」），雖然郭老太鄺肖卿都有到場，但就唔見老大蒲頭，反而三弟郭炳聯就帶埋老婆一齊出席主持儀式，仲有舅父鄺準都有撐場。
郭炳聯噚日扶老攜「妻」，準時到場，又將由馬會挖角嚟嘅一田百貨新任常務董事莊偉忠，介紹畀郭老太同舅父認識，可以睇得出，郭炳聯對郭老太有幾尊重，不過，講到尊重，郭家三少奶劉寶賜就最醒目，全程傍住奶奶。
母子同心不答問題
咁都唔止，話說當儀式接近尾聲，一班傳媒已經守喺出口等郭生。想問吓佢大佬幾時「復工」、近況如何？不過，郭炳聯坐喺台下早就發現記者等緊，所以坐立不安，後嚟動身由另一出口離開，喺一眾保鑣、商場保安、公關大員等組成嘅人牆護送下，快步坐上私家車，阿媽同老婆都留低唔理，自己走咗先！
好彩媳婦仲陪伴在側，到儀式完咗，郭老太喺新抱及眾人開路下快步上車，對傳媒嘅問題一概不答，果然母子同心。
mailto:[email protected]