香港大學發表畢業生就業報告，透露新畢業生平均月薪一萬七千元。呢個數字認真唔錯，小記者Ｇ報道完呢單新聞之後，自怨自艾一番：「讀新聞系做乜鬼吖，我哋畢業後做記者，做咗五年都冇一萬七千蚊一個月，每日寫稿講通脹、講米貴、講香港打工仔去年加薪幅度，冇時間諗自己嗰份糧，𠵱家睇一睇，幾乎喊得一句句。」左丁山叫佢唔好心灰，一於以新聞界翹楚盧永雄為人辦，盧先生做記者出身，畢業二十三年後貴為星島新聞集團行政總裁，年薪九百萬，足令新聞系學生士氣大振！
我哋知道盧永雄幾多薪酬，皆因上市公司年報要列明董事及主要行政人員嘅薪酬。財務Ｅ對呢項披露，十分不滿，因為佢嘅八位數字年薪，現時街知巷聞，令佢受到好大親戚朋友壓力、同事壓力。佢話：「呢啲所謂公司管治透明度，根本不合國情。」左丁山明白嘅，西方一啲做法，嚟到東方就會變樣，公開晒高層薪酬之後，就會引發眼紅症、肥上瘦下症、忿忿不平症、貧富懸殊症，症狀之多，令老細都吃不消。
另一項公司管治基準就係會計上每年度重估物業及長期持有嘅投資，即係MarktoMarket，財務Ｅ話：「呢條橋係啲會計師諗出來為佢哋行業增加生意嘅，短期投資係要MarktoMarket，但自用寫字樓物業，一啲對沖性財務工具，係都要估計最新時值，簡直做死人，亦令到盤數亂龍，散戶投資者亦分唔出邊啲係正常營運利潤，邊一啲係一次過利潤與虧損。」
仲有一樣就係學美國發佈季度財務報告，愈係大財團，愈係為此做到死。美國式季度報告往往對公司策略有負面影響，因為每季要改成績表，美國唔少大公司為咗面子，總要在數字上做吓手腳，避免分析員責怪，行政總裁嘅視野因此唔能夠放得遠，點都要顧全三個月後可以賺到幾多先。財務Ｅ認為美國此制度不值得效法，長期嚟講，投資者是否得益，大家存疑，左丁山以為此乃全球化之代價，香港要做世界城市，被迫追隨世界潮流。可嘆者乃係我哋通常未學到西方好嘢之前，先學齊啲陋習。