港府唔畀國殤之柱雕塑家入境，破壞晒香港向來自由開放嘅國際形象，真係老土到爆。社民連外務副主席陶君行亦係過來人，佢呢個月初忙裏偷閒，原本諗住同老婆孔令瑜去澳門度周末；但由於佢去年底曾被拒入境，呢次都係博一博「闖關」。結果佢哋抵達澳門口岸時，女嘅順利過關，男嘅行人止步，呢對「革命鴛鴦」惟有打道回府。
被「遣返」前，陶君行要求對方畀個解釋，擾攘幾個鐘頭，治安警察局出入境事務廳卒之畀張「拒絕入境通知書」佢，表示根據《內部保安綱要法》唔畀佢入境。八方翻查資料，澳門方面只要覺得一個人危及治安，就可引用呢條法例拒絕有關人士入境，對付恐怖分子都係靠呢條例，唔通陶君行疑似恐怖分子？
考慮狀告鏵哥
陶君行透露，正考慮同曾被澳門拒絕入境嘅長毛一齊狀告鏵哥，指佢無理拒絕兩人入境，佢話連澳門都唔去得好無奈，「兩岸四地中國人嘅地方，我只可以去台灣同返香港。」據八方了解，香港一知名人士都被澳門列入「黑名單」，早前赴澳處理生意時被拒入境，懷疑可能同佢幾年前出錢出力「倒董」有關。