前排電視播韓劇《大長今》掀起咗一片食療養生嘅熱潮，唔知𠵱家重有冇人記得？最近畀我喺中醫藥管理委員會嗰網頁度，發現咗一篇關於中醫飲食養生嘅文章，食療強身源遠流長，單係要揀配合唔同體質嘅蔬果，已經大有學問。
我哋嘅身體大致可以分為四種體質型：身形偏瘦又結實，加上面色同唇色都偏紅，性格比較急躁，鍾意冬天多過夏天屬「陽熱型」；面色同唇色都比較蒼白，好多時胃口都唔係幾好，容易口淡、疲倦，唔鍾意飲水，又最怕冷嘅人屬「虛寒型」；時時都潮熱大汗，身形偏瘦，容易口亁、失眠同大便唔暢通，又經常覺得手心好熱就屬於「陰虛內熱型」；身形肥胖、鍾意瞓覺多過運動，嗜食肥膩嘢，嗰口時時有黏膩感覺就多數係「痰濕型」。
冬菇最啱「虛寒型」
按住自己身體嘅狀況揀啲啱食嘅蔬果，就係食療養生，效果未必會好快出嚟，但慢慢應該會有幫助，例如「陰虛內熱型」嘅人，可以食多啲白菜，因為白菜特性比較甘寒，可以幫助消化，同埋暢通大小便。
「陽熱型」嘅人就可以食苦瓜，因為苦瓜可以清熱解暑，又有清肝明目嘅功效，有濕熱同肝火盛就最啱食。
「虛寒型」就可以試吓食冬菇，因為冬菇可以健脾和胃，最啱脾胃虛弱、成日無胃口嘅人食，長期食重可以改善體質。「痰濕型」嘅人就可以試吓食冬瓜同絲瓜呢類清熱蔬果。順便一提，木瓜有通乳汁嘅功效，最啱餵母乳嘅女士食。
blog主：醫神