前晚喺亞視錄影廠舉行嘅《第十四屆十大電視廣告頒獎典禮》，一班頒獎嘉賓包括張文慈、陳少霞、陳彥行同李曼筠（動漫Maggie）均屬「有料」之人，不過當晚只有張文慈同陳少霞以低胸性感吊帶裙出現，其中又以張文慈身材最突出，酥胸半露嘅佢成為全場焦點，陳彥行同動漫Maggie就包到實，當堂冇晒睇頭。至於身為表演嘉賓嘅莊思敏，就着住小背心同低腰裙露出小蠻腰，化身「印度西施」跳舞，意態撩人。
張文慈落車時左遮右掩，好似好尷尬咁，事後佢話只係「人有三急」。講到性感搶晒鏡，張文慈話：「我都係尊重大會，𠵱家身材都OK。」但見張文慈塊面爆晒瘡，佢解釋話：「呢排腸胃唔好，加上我隻15歲松鼠狗唔舒服，吊緊鹽水，又認唔到我，搞到我瞓唔着，所以搞成咁。」
JiJa唔敢着裙
另外，電影《女拳霸》女主角JiJa當晚做頒獎嘉賓，佢話最想拍波鞋同朱古力廣告，問佢想唔想拍一啲女性化用品嘅廣告？佢透過繙譯話：「我唔多似女仔，拍美容同香水廣告唔夠說服力，我冇地方可以性感，上次首映着咗裙之後我都唔敢再着，好尷尬呀！」
