香港篤信玄學者眾，社民連破格以風水拉票，堪輿命相專家馬禮華原來係該黨成員，除咗落區指點街坊迷津，噚日又聯同幾位術數家協會成員點評下任特首人選面相。八方綜合專家意見，發現原來下任特首可能真係有樣睇，想做特首嘅人，可以按圖整個咁嘅樣，分分鐘有運行。
政務司司長唐英年係下任特首頂頭大熱，佢個樣最突出係塊面好長，馬禮華指佢相格屬馬面木形，優點係思想縝密，但做領導人卻稍嫌優柔寡斷，「佢從商好過做官，做幕後好過幕前，司長個位適合佢，做特首就太辛苦喇。」馬師傅又指唐英年雙耳「唔靚」，可能細個時父母管得太嚴而唔開心，而馬面最忌嘴細，唐英年個口衰在唔夠大，「體力差啲」。
唐唐眉目「有勢」
八方聽落，唐英年好似幾弊喎，不過馬師傅讚佢眉目「有勢」，「對眉生得好貼服，顯示佢分析力強。」又指唐英年個鼻較高，相學上係優點。做特首唔係靠個樣，時勢都要配合，馬師傅指2012年特首選舉年係龍年，唐英年屬龍，當年60歲，冲正太歲，恐防佢運程麻麻，隨時出師不利。
另一準特首候選人財爺鬍鬚曾個相可以用四個字形容：「平平無奇」。馬師傅指有時咁先係好樣，「面相平衡，做官平平穩穩。」佢指鬍鬚曾有冇機會做特首，唔係睇樣而係睇後腦，「我睇過佢個頭，後腦好圓滿，係孭得起責任嘅人。」鬍鬚曾最大特徵係唇上二撇雞，馬師傅指佢個嘴形唔錯，但千萬要勤剃鬚，「如果鬍鬚長過嘴角，就會多是非，容易俾人篤背脊，而且講嘢冇說服力。」
鬍鬚曾要勤剃鬚
八方平日見鬍鬚曾一定官仔骨骨，相信佢都好注重儀容日日剃鬚，應該可以避過唔少俾人篤背風險。馬師傅透露，早前佢喺公開場合見過鬍鬚曾，握手打招呼時驚為天人，「佢隻手好柔軟，軟過好多女性，不過手骨好硬，係個剛柔並重嘅人。」
聽完馬師傅點評兩個特首大熱人選，做特首可能真係有樣睇，如果有人生出唐英年對眼同鼻，留撮二撇雞，加埋鬍鬚曾個面形同耳仔，咪正牌特首相！至於「疑似特首候選人」梁振英有冇特首相，馬師傅話唔使睇，「佢面相係獵鷹格，志不在此！」
mailto:[email protected]