日本人最愛吃海鮮，魚生、壽司都以魚類為主，今日由紅磡區料理鐵人馬仔哥示範幾款以海鮮為主的日本料理，鮮味的番茄蟹湯、香濃的海鮮汁銀鱈魚，還有火炙吞拿魚他他其沙律！和風海鮮菜又點止魚生咁簡單呢？
記者：黃潔蓮
攝影：伍慶泉
示範：紅磡區料理鐵人馬仔哥
5年前初次投身飲食業，已奪得新城電台舉辦的「食神大賽」冠軍，人稱紅磡區料理鐵人，得獎菜式海膽焗飯更成為他的鎮店名菜。
吞拿魚他他其沙律
0hr15min
份量：4人
「他他其」Tataki其實係一種烹調方法，即係將魚肉用猛火煎封表面，但裏面仍是生的，比起吃魚生，又是另一種風味。
材料
澳洲沙律菜200克、吞拿魚300克、京葱絲少許
汁料：味醂3湯匙、濃口豉油2湯匙、穀物醋2湯匙、白蘿蔔茸2湯匙、日本紅辣椒醬少許
做法
1.大火先燒熱易潔鑊，收細火不用下油，把原件吞拿魚煎至四面金黃色，再放進冰水冷卻。
2.碟上鋪上沙律菜，把冷卻了的吞拿魚切片，排放在沙律菜上。
3.將汁料調勻，淋在吞拿魚上，撒上京葱絲即成。
Cindy問：穀物醋即係咩醋呢？用一般白醋、紅醋、鎮江香醋得唔得呀？
答：穀物醋即日本米醋，味較醇，其他醋酸味太勁，會搶味。
海鮮汁銀鱈魚
0hr15min
份量：2人
鰻魚汁味道鮮甜，還可以用來煮肥美的銀鱈魚，鮮味會更突出。
材料
銀鱈魚300克、冬菇2隻（切絲）、京葱絲/薑絲/甘笋絲各少許、胡椒粉/鹽/生粉各少許、鰻魚汁3湯匙、煮酒1湯匙
做法
1.將銀鱈魚加鹽及胡椒粉醃勻，拍上薄薄的生粉，然後放入鑊中煎至兩面脆香金黃。
2.另起一鑊大火下油炒薑絲、甘笋絲，先下煮酒再下鰻魚汁炒勻至軟身。
3.將所有配料連醬汁倒入煎銀鱈魚的鑊中加京葱絲，收細火煮至汁料收亁至稠即成。
嚴小姐問：點揀銀鱈魚？點煎先至唔會捲埋一嚿？
答：銀鱈魚魚鱗較細較密，魚色較白，油魚魚鱗較大片，魚色偏米黃。銀鱈魚扒皮煎的時候會捲埋一嚿，最好在魚皮上𠝹花，那就不怕捲。
青椒仔牛肉卷
0hr20min
份量：6人
唔想做金菇牛肉卷咁單調，可以用青椒仔加洋葱絲捲埋，口感會更爽。
材料
日本青椒仔5隻、洋葱1/2個、肥牛肉5片、牛油1片、淡口豉油/煮酒各少許
調味：鹽/胡椒粉各少許
做法
1.先將青椒仔及洋葱絲炒香。
2.牛肉鋪碟上，平均放上青椒仔及洋葱絲，然後將之捲起。
3.將捲好的牛肉卷放入平底鑊中，加牛油煎至金黃色，收細火後下煮酒及淡口豉油煮成醬汁，下鹽及胡椒粉調味即成。
尹小姐問：青椒仔會唔會有陣臭青味呢，因為我個仔唔鍾意青椒陣味，又怕苦，有咩辦法去除？
答：日本青椒仔多以溫室種植，所以不會有菜青味，汆水不能去除菜青味，可以砂糖和酒炒香。
羅小姐問：用肥牛已經好肥，我怕肥唔落牛油或油去煎，用肥牛啲膏去煎得唔得呢？做金菇肥牛卷個方法係咪都一樣呢？啲金菇係咪要汆水後至捲呢？
答：不落油要用易潔鑊，不怕黐底。但做金菇牛肉卷毋須汆水，因金菇太熟會無咁好口感。
肉醬番茄蟹湯
0hr25min
份量：4人
這個湯因加入了木魚高湯，而變成西日式做法。木魚與蟹同為海鮮，鮮味會更濃，比起用雞湯、番茄湯會更香。
材料
免治豬肉200克、番茄1個、小棠菜2棵、嫩豆腐1/2盒、蟹1隻、西芹/京葱絲各少許、木魚高湯1公升、鹽1/2茶匙
醃料：胡椒粉/鹽/生油各少許
做法
1.番茄洗淨後一開八；小棠菜、西芹洗淨切短度，豆腐切塊。
2.蟹劏後洗淨斬件，以醃料略醃。
3.鍋中加入小棠菜、西芹及木魚高湯煮滾。
4.滾起後轉中火，加入蟹、豆腐、番茄及免治豬肉，待材料煮熟後冚蓋煮10分鐘加鹽調味，撒入京葱絲即成。
Iris問：市面上有咁多種蟹，三點蟹、花蟹、肉蟹、膏蟹，用咩蟹最好呢？用公定乸好呀？
答：以花蟹較好，其實如可以的話，水蟹最甜，季節計算，公乸都差唔多。
網上重溫
http://cooking.appledaily.com