自由黨慶祝成立十五周年，四月二十一日在四季酒店舉行酒會，招待政商界人士，成個四季宴會廳逼到爆晒，連何鍾泰議員都只能企在門口。社長L亦企在門口頭岳岳，話人太多，行唔到入去。社長L以前做編輯時，負責寫政治八卦專欄，現在貴為社長，仍然成日在中環周圍撲，有料就記低，返到辦公室即時叫手下跟進，成個雜誌社最高級線人咁款，真係服咗佢。
左丁山去慣大型酒會，一定趕在曾特首到場之前去到，所以入場冇難度。班自由黨高層在大廳迎賓，同佢哋握完手之後，就碰到物業管理行尊S，握手之後同佢講：「四季係唔係你管埋㗎？係你哋公司地頭噃！」物業S話：「我現在打理公司嘅內地地產發展多啲。呢度唔輪到我管。」後來見到物業S同自由黨人員上台，先至醒起佢係自由黨中常委，唔怪得自由黨擺酒會，要在四季舉行啦，物業S出句聲就會易辦事好多，此所以自由黨辦起事嚟，比其他政黨容易，除咗有錢之外，所有商界高層，自由黨有邊個唔識呀？啲中常委打個電話就掂。
自由黨人大舉出動，高官議員齊捧場，只係泛民主派議員好似冇乜邊個露面，余若薇好似有人見到喎。高官方面，既然曾特首駕臨，唐司長，曾司長，馬局長，曾局長，張局長等都畀左丁山見到在現場出現，中方人士有中聯辦副主任黎桂康與外交部駐港人員。自由黨放映幾分鐘影帶，講自由黨威水史，由李鵬飛講起，中間有一段話：「二○○三年，反對二十三條立法。」好忠於歷史啫，只不過黎桂康在座，會唔會記在心頭呀？
曾特首與好多自由黨人站台，睇清楚，有一位中常委呂志華，著名股評人也。不禁奇怪為甚麼呂志華到證監會為Accumulator苦主申訴時，陪佢去嘅竟係民建聯議員陳鑑林，而唔係自由黨議員？股市自高峯回落，買Accumulator之人，自然輸得好慘，但佢哋算係大戶或專業投資者，照計輸咗大錢咪做阿Q囉，周圍投訴都唔會得直嘅啫。