民政事務局前局長何志平出新書，噚日舉行簽名兼座談會，佢位息影女星太太、「靈氣迫人」胡慧中，帶埋7歲半囡囡何淦璇（Audrey）到場撐老公。肥平無官一身輕，胡慧中唔做官太更加百無禁忌。佢話5月2號未必喺香港睇聖火傳送，因為當日唔喺香港，亦唔打算上京睇奧運，怕逼人；香港舉行嘅馬術賽都唔睇，驚危險咁話……真係大吉利是。
人走茶凉，噚日冇局長現身，只有中聯辦代表同幾個民政局官員，港澳辦前副主任陳佐洱千金陳晴最畀面，一口氣掃10本書。肥平新書名為《文化政策與香港傳承》，冇爆官場內幕，齋講文化藝術，由肥平同佢御用文膽陳雲根（筆名陳雲）聯著，陳雲超級fans可考慮捧場。