陳太早前喺立法會怒斥林D9，慨嘆自己當年「冇帶眼識人」，八方噚日見到陳太戴副眼鏡開會，唔通佢怕再睇錯人，所以配新眼睛睇真啲？陳太話因為右眼微絲血管爆咗，所以要戴眼鏡，至於係咪俾林D9激到爆血管，佢就冇講。
陳太當眾鬧林D9，成為近日官場最熱門話題，八方聽聞啱啱過去嘅星期三，一班退休、現役AO飯局，葉劉同媽打李麗娟等10幾人出席，當晚陳太冇到，成班人坐埋，一齊八卦陳太點樣睇錯林D9。據講席間有人話，呢句說話係粵語長片女主角鬧負心漢對白，赫然聽到陳太喺立法會上講出呢句經典金句，特別有戲劇性。當晚在場嘅媽打同八方講，老友敍舊都係閒話家常，大家唔會講啲nasty嘅嘢。