李彩華（Rain）和變靚D老闆蕭定一04年傳緋聞，二人名字一直掛鈎三年，其關係撲朔迷離，早前卻傳出二人結束地下情，可是前晚二人翻撻成功，相約看電影《功夫之王》，Rain卻解畫指做媒為蕭定一介紹同行女伴。
李彩華近日忙於為亞視新劇《火蝴蝶》谷宣傳，她自04年被踢爆與變靚D老闆蕭定一拍拖後，緋聞維持了三年，隨着蕭定一近年經常被拍到身邊女伴團團轉，Rain便決意退出，可是前晚有人目睹二人結伴往觀塘apm看李連杰主演的電影《功夫之王》，其間他們態度親暱。
鬼祟入場
穿上白T恤配綠色長褲的Rain，與穿深色外套的蕭定一，分別帶了一名同性朋友做電燈膽，一行四人相約看前晚11時35分開場的《功》片，他們早了10分鐘到場。期間Rain頭耷耷，狀甚鬼祟，當發現被其他途人注視時，她即與女伴往洗手間，而蕭定一則與男友人往小賣部買爆谷零食，Rain和女伴刻意站在女廁門外等候入場，她不停拉低白色鴨舌帽遮掩容貌，直至入場才與蕭定一會合，然後四人排排坐，完場時，他們便閃電離開。
稱做媒人
記者昨日致電Rain，她直認與蕭定一看戲，並說：「我哋成班朋友去睇，其中一個女仔係蘭桂坊公關Brenda。」二人可是舊情復熾？她否認說：「我同阿一（蕭定一）冇可能㗎，我對佢冇feel，佢唔喺我擇偶範圍之內。我唔鍾意同圈中人拍拖，我哋睇完戲都各有各走啦。」
既然Rain自稱與蕭定一只是朋友，那可會介紹女友給對方？Rain說：「所以我噚晚咪叫埋朋友陪佢睇戲，我係中間人之嘛。」做媒成功嗎？她說：「咁我未問佢哋喎。」
採訪：比華利
