官場「拆彈專家」孫明揚上任唔夠一年，已拆下大部份前朝遺下「炸彈」，教育界額手稱慶，男拔萃更將校內新玻璃屋飯堂內一棵小葉欖仁樹以孫公命名，噚日請孫公到場，係咁意翻吓泥頭，主持「植樹」儀式。八方見呢棵樹又粗又壯，枝葉茂密，第日學生食飯時有孫公遮蔭。
男拔附小校長羅錦麗話，為幫學校籌款，呢間玻璃屋內每棵樹命名權10萬蚊，孫公嗰棵係送嘅，其他三棵就收捐款，全校花草命名權總共籌到150萬元，比舊年多一倍。校內另有王永平樹同廖秀冬樹，但就冇李國章樹同羅范椒芬樹，有都怕且俾人劈開變咗做柴咯。孫公噚日參觀學校時，特別讚賞小學部一名外籍英語教師，可能有微言大義。