一年一度資深大律師委任典禮噚日喺高等法院舉行，「新鮮出爐」五名資深大狀各有專長，包括唯一專長打刑事案嘅女資深大狀，郭莎樂（CharlotteElizabethAnnDraycott），其餘四人分別係包華禮（MohanTarachandBharwaney）、李紹強、AnthonyKennethHoughton同林雲浩。李紹強係律政司高級助理刑事檢控專員，其他四人皆私人執業。
郭莎樂係高院暫委法官賴磐德（PeterJohnLine）嘅妻子，分別於81同88年喺英國同香港成為執業大律師，係現時唯一專注刑事法嘅女資深大狀。賴磐德話對妻子takesilk引以為榮。李紹強則形容自己心情「好似再結婚咁！」
39歲嘅林雲浩係五人中最年輕，佢係小甜甜爭產案中，陳振聰星級律師團成員之一；54歲嘅包華禮最年長，律政司司長黃仁龍致辭時笑問，點解遲至今年先申請做資深大狀，包華禮致辭時解釋，因為想恃老賣老，可以代表其他人發言。
包華禮係現任大律師公會主席袁國強師傅，袁03年獲委任資深大律師，據講師傅希望待愛徒當上公會主席後始申請做資深大狀，𠵱家終於達成心願。