傳統勁旅千葉市原，開季踢7場都仲未「開齋」，好多球迷都問，究竟呢隊波搞乜？講到尾，都係管理層唔夠專業，球員怨聲載道，想成績唔差都難。
市原前身為古河市原，是1967年日本甲組聯賽設立以來，唯一從未降過班的球隊。今日成正宗魚腩，更被批死會降班；但市原成績差唔可以怪班球員，錯就錯在管理層唔專業。市原今季有水野晃樹、羽生直剛、山岸智同水本裕貴等國腳離隊，轉會好平常；但走人唔係因為錢，係不滿管理層處事手法。
市原上季季尾宣佈辭退教練奧禪及球會總經理（TadashiKarai）。總經理一職向來是金飯碗，上任一年便被辭退已非常罕有，最令人大惑不解是他被辭退後，仍負責與球員傾新球季合約，難怪球員有不滿。
多名新兵皆屬次貨
市原內部千瘡百孔，而球員唔係唔鍾意球會，只係不滿管理階層，既然有其他球會高薪挖角，便轉會他投。日本足總規定球員約滿轉會亦要支付轉會費，其中水野晃樹轉投些路廸，就得到80萬美元，市原本可擴軍，可惜班高層眼光極差，新加盟的馬場憂太、苔口卓也、谷澤達也、外援保斯拿及靴高域屬次貨，睇怕市原唔見棺材唔流眼淚，下季降落乙組先懂得反省。
到時球迷可能要唱呢支歌仔：「Sayorana，忍着淚說一聲Goodbye！」