平日以出席宣傳活動𢱑銀的無綫花旦廖碧兒和郭羨妮，趁夏天又博盡出擊搵真銀，兩位花旦前晚及昨日分別接連參與兩項活動，各自咪咪大解放，打扮相當性感。廖碧兒昨到廣州硬銷珠寶不惜酥胸半露，配襯百萬鑽飾閃爆全場，至於郭羨妮雖已到低胸極限，但她揚言：「再開放啲咪着低啲囉。」果然有錢使得鬼推磨。
被譽為無綫搵銀花旦之冠的廖碧兒，向來是廣告商及宣傳活動的寵兒，不過今夏則有剛憑劇集《古靈精探》人氣回升的郭羨妮加入戰團，兩女前晚及昨日各自出席兩個宣傳活動，各師各法行性感，但以廖碧兒酥胸半露的養眼打扮勝一籌。
北上掘金
昨日穿上低胸裝的廖碧兒到廣州出席豪庭珠寶新店開幕活動，珠寶商更準備價值100萬元的鑽飾給她佩戴，同時又安排數名保安員維持秩序，廖碧兒識做地說：「大會嘅鑽飾係以花做主題，𠵱家好流行花嘅款式，夠大方可配襯唔同服裝，我都鍾意鑽飾，我記得第一件首飾係爸爸送，因為佢話女仔第一件首飾係要由男士送，佢爭住送鑽石吊墜畀我，可能唔想畀第二個男士送先。」她自言買過價值10萬元的鑽飾送給自己，如有機會也想嘗試自己設計鑽飾。
北上𢱑銀前，廖碧兒前晚先到數碼港出席愛彼錶派對，擔任表演嘉賓的她穿着性感舞衣載歌載舞，其舞衣更是由母親為她特別縫製。
終極性感
另一方面，郭羨妮前晚以代言人身份，出席在蘭桂坊舉行的COVERMARK派對，同場還有向海嵐、李詩韻、陳道然（蘭子）及鄧上文等，以Cristinaeffe低胸性感晚裝艷壓全場的郭羨妮，配襯母親送贈的首飾，她說：「件衫本來仲低胸，不過個胸位我縫高咗少少，都已經夠低，係自己極限。」問她私自改款會否不好？她說：「唔緊要啦，之前擔心過太性感，不過大會叫最緊要打扮得靚啲同閃啲，第二時再開放啲咪着低啲囉。」
對於今次的酬勞郭羨妮表示很滿意，現在有化妝及護膚品贊助，年中慳回不少，她笑說，如果有洗頭及冲凉液更好，記者問她若拍這些廣告要大露背演繹，郭羨妮即說不會介意，拍得有美感便行，剛表示低胸裝已是終極性感的她，為𢱑撈果然乜都肯博。
採訪：曾小嘉、王崇穎、梁錦雯
攝影：仇志德、陳偉權
