八方噚日為一嘗做特首滋味，去幫襯為前特首董建華剪「平頭裝」嘅中環上海新文華理髮店。呢間有45年歷史嘅老店噚日最後一日營業，顧客盈門，仲有陣陣爽身粉味。八方瞓上張「古董」飛髮凳，由刀法利落如武林高手嘅85歲余師傅操刀剪髮。
「我以後去邊度剪髮？」
耳邊響起對話，76歲顧客孔先生對72歲老闆徐達禮講：「我以後去邊度剪髮？」佢由黑變白嘅頭髮，30幾年都喺呢度剪，「全世界搵唔到咁好，一句講晒，服務周到。」87歲康先生推門入嚟指定要李師傅，師傅遞上熱毛巾，兩人「儂儂」聲嘅上海話講不停，八方當然聽唔懂，但就似足《花樣年華》咁。
曾開裁縫店嘅康先生話，上海人50年代南下香港，要有「少少本事」才可謀生，𠵱家老師傅日少，功藝失傳，「因為裁縫唔夠，我間舖先冇做。」86歲李師傅邊聽邊瞇瞇笑，雙手繼續游走於打理咗近半世紀嘅頭髮。除咗頭上煩惱絲，師傅都會為顧客修面，眉毛、耳毛都修埋。徐師傅話學修面剃鬚都要兩、三年，日日用西瓜練習，上海師傅剪髮腳嘅工具「磨剪」快失傳，慨嘆「𠵱家啲人唔識用咯。」
老師傅老顧客閒話家常之際，突然有個後生仔推門而入，原來係隔籬街Salon老闆慕名而至剪髮，好感慨咁話上海師傅技巧純熟，「我哋呢一代好難做到。」徐師傅退休返上海養老，新文華噚日傍晚正式拉閘，老店又少一間。