A股早兩日升咗咁多，噚日終於要唞唞氣，港股靠A股造好炒上，自然亦要跟住唞唞氣，恒指跌164點收市，跌幅唔算大，但穿頭破腳嘅形態，技術上唔多盞，下禮拜一可能要跌多一段先企穩。
不過個市係有變數嘅，因為下禮拜二即月期指結算，好淡雙方會撐得好勁，如果昨晚花旗股市冇乜大變，下禮拜一朝早A股又企得穩，淡友想大反攻唔係咁易，睇番條100日線好近，恒指靠近25000關應該會有好多買盤，偷步買盤喺25200水平應該已經出現。
正股技術走勢佳
大家反而要留意成交額，噚日縮咗好多，得番936億，喺跌市嚟講，算係好現象，但個市要炒上，成交唔可以少，整固嘅時候900億左右嘅成交冇乜所謂，但港股如果要大升，冇過千億嘅成交，好難向上破位，亦唔容易吸引投資者入市，所以大家要昅實啲成交。
下禮拜又係花旗聯儲局議息嘅時候，議息嘅前後花旗股市會好飄忽，碰啱下禮拜四港股假期，假前假後嘅對策最好早啲諗定，兩手準備當然最好。
碧桂園C輪9075：碧桂園（2007）昨收6.89元，升3.29%，內地樓市雖然陰晴不定，但碧桂園技術走勢幾好，短線有機會破7.40元推向8元，可以買啲相關C輪短炒。碧桂園C輪9075昨收18.1仙，槓桿率3.8倍（有效2.4倍），對冲值0.63，正股升上8元，9075應該唔會低過25仙，正股跌穿6.40元，沽出隻輪止蝕。