日前有雜誌影到謝安琪（Kay）同張繼聰（Louis）嘅囝囝張瞻，因病需要急call救護車送入醫院。王菀之（Ivana）噚日去到商台接受《五天精華遊》節目訪問，身為張瞻契媽嘅Ivana話佢唔係咁清楚詳細嘅情形，只係知道阿Kay兩公婆正處於艱難時刻，過緊一個難關，作為朋友嘅佢會為佢哋祈禱。
十分擔心張瞻情況嘅王菀之仲話一路都有同阿Kay保持聯絡，問住契仔嘅健康進展，經過呢件事令佢體會到做人父母真係唔簡單，身為父母嘅一定會好擔心囝囡嘅健康。
眾友致電問候
馮仁昭噚日都有打電話畀Louis問候佢個囝囝現時嘅情況，Louis話囝囝係腸胃唔舒服，屙咗好多次，加上𠵱家啲細菌好犀利，所以佢哋嗰日call白車送囝囝入院以策安全。Louis話囝囝留院觀察咗一晚，第二日就出咗院啦！當時佢同阿Kay都有留喺醫院陪住個仔，悉心照顧佢。
Louis又指近日留喺屋企寫歌嘅時間比較多，所以有多啲時間睇住囝囝，而喺報道出咗之後好多朋友打電話慰問佢哋，佢哋好感激一眾好友嘅關心。
