曾幾何時，號稱「香港愛廸生」嘅黃金富大鑼大鼓宣佈話要收購8號仔（查實係舊年9月），可惜之後就冇晒下文。之不過，佢老人家冇因為做唔成電訊大亨就退隱江湖，而係好落力咁打理自己揸弗嗰隻智富能源（1051），前排仲走去蒙古收購煤炭項目。
可惜好景不常，個項目仲未成事，隻智富就經已喺前日俾一名報稱商人嘅蘇丹丹女士入稟高院，控告佢未有履行雙方協議。
據入稟狀講，蘇女士獲智富聘請咗做顧問，仲介紹咗兩單蒙古生意畀智富，按協議應該有顧問費收番，點知一個屈尾十，智富就繞過蘇女士，直接同個賣家deal，所以蘇女士入稟要求索償。
華華唔清楚誰是誰非，不過智富股價似乎冇受影響，噚日仲升咗4%㖭！