無綫《勁歌金曲頒獎禮》將於今年開始，每回優秀選的入選歌曲由12首增至14首，故年底將多了六首歌爭逐十大金曲，無綫方面否認因分獎不均才要加獎，何超儀及吳雨霏（Kary）等對此大表歡迎，超儀更表示如果有份攞獎的話，一定開心到fing甩頭。
每年無綫舉行的勁歌金曲頒獎禮均是歌手們爭獎的戰場，《勁歌》年前由一年四次季選改為每年三回的優秀選，減低歌曲入圍數目，但前晚無綫高級經理陳家揚在將軍澳電視廣播城宣佈，今年將每回優秀選頒發12首入圍歌，增加至14首，故年終將有42首歌曲爭逐全年十大。
鼓勵創作音樂
今年第一回優秀選將於下月3日舉行，陳家揚說：「樂壇越嚟越多人，我哋每年都會開會作出調動，其實05年試過增加到40首歌入圍，係有加過嘅。」問到是否與唱片公司不能達成共識，分獎不均才要加獎？陳家揚謂：「梗唔係，我哋係想畀多啲唔同類型嘅音樂入選當鼓勵。」此決定是否順應唱片公司要求？陳家揚說：「唔係，係希望鼓勵創作，畀機會唔同嘅人。」
吳雨霏有信心
歌手們對此都大表歡迎，何超儀、吳雨霏及李卓庭等前晚到電視城錄影《勁歌》時，超儀表示：「係好事嚟，樂壇𠵱家萎縮緊，多啲人參與先發得番大，加多兩首歌呢個發明真係偉大，對歌手係鼓勵，越多鼓勵越好，如果畀獎我實好開心同感激，有獎我fing到頭甩都冇所謂。」問她覺得自己有沒有機會入圍？超儀說：「冇諗過呀，我一向冇乜為電視台做嘢，可能冇乜份。」
Kary一身短裙配高踭鞋亮相，十分搶鏡，她說：「咁咪好囉，多啲機會入圍，樂壇越多人係好事。」怕不怕多人變相多競爭？Kary謂：「有競爭係好事，我對自己有信心，對公司都有信心呀。」
採訪：胡比 攝影：陳順禎
