無綫同湖南衛視合辦嘅大型舞蹈節目、第二季嘅《舞動奇跡》近日開鑼，參與演出嘅無綫小生花旦包括胡杏兒、湯盈盈、胡定欣、伍詠薇、鄭嘉穎、馬國明同郭政鴻等，連日開始分批比舞。
日前大會舉行女子組賽事，杏兒身穿粉紅色低胸舞衣相當養眼，舞姿都似模似樣；湯盈盈着魚網襪露玉腿跳探戈，仲投入得忘記綵排時傷頸之痛；胡定欣就打出肚皮大跳肚皮舞；伍姑娘一味浮誇，戴咗個高到無倫嘅鮮粉紅色假髮上陣。相比之下港姐王君馨較平庸，不過佢都唔執輸，表演一字馬搶鏡。
難忘攞滿分
噚日馮仁昭打畀杏兒，身在湖南嘅佢話今日先舉行淘汰賽，佢話：「我應該冇咁快俾人淘汰啩？我覺得唔係同人鬥嘅。雖然我冇學過跳舞，但覺得幾好玩。」
女子組咁出色；男子組惟有用力的表現嚟攞分。男子組賽事舉行當晚，鄭嘉穎單手抱起女拍檔，以電眼狂冧觀眾，而着空軍服亮相嘅馬國明抱起女拍檔周圍fing，嘥力兼難度高。
另外，馮仁昭日前瀏覽胡定欣嘅比賽片段，佢動作利落，難怪得滿分，嗰段片喺網上播出兩日，已經有超過2萬人瀏覽，認真誇張。胡定欣前日更新網誌時話：「我永遠都唔會忘記呢個moment。哈哈……不過開心得嚟，亦都有啲壓力，因為嚟緊要跳下一隻舞！」
《舞動奇跡2》網址
http://www.hifly.tv/s1431/album-1431-0.html
胡定欣blog
http://blog.tvb.com/nancywu/
