全國反法，風起雲湧，《人民日報》急急發表文章，呼籲人民冷靜（見四月二十一日《蘋果日報》報導）。
反法國之具體行動，係包圍家樂福。家樂福超級市場僱用四萬人，係中國人噃，內裏銷售物品，幾乎全部係中國供應商供應，假如家樂福因中國人民愛國而執笠，返回巴黎，最受損失打擊嘅係法國人吖，還是中國人？大概愛國人士血氣上湧，都唔得閒去計吓數咯。家樂福一旦關門，最大得益者係美商沃爾瑪，沃爾瑪在全世界以向供應商壓價入貨著名，得沃爾瑪一店獨大，中國人民有何得益？
反法國，最有種做法係不飲法國紅酒，不穿法國名牌時裝，不用法國化妝品，不買空中巴士，不去法國留學，不移民法國，不學法文，甚至不再提周恩來、鄧小平等人曾經勤工儉學，到法國半工讀。
可惜呢，今日已經全球化，中國不能脫離歐美而獨自繁榮，盲目愛國主義只會害國，不會令國家富強。奧運有甚麼大不了，除咗亢奮威風一個月之外，你估北京人會日日使用「水立方」與「鳥巢」咩，呢兩座建築物只係以後嘅昂貴紀念品而已，係外國建築師在中國嘅地標。
在中國搞自發性愛國運動，只會係五分鐘熱度，頂多一兩個星期，就會畀中央叫停，中央叫你上街就上街，叫你返屋企就返屋企，否則就係反動分子，破壞社會穩定，愛國係只准在特定範圍內、特定時間內發動嘅，就似在一個鳥籠內愛國，不准踰越，此名為「鳥籠愛國」，與「鳥籠民主」相同。中央最怕任何人，任何團體透過任何媒介，可以發揮影響力，組織一種大規模嘅活動；中國只有一個團體可以咁做，其他一概不能、不准，違者好快就會入監倉。呢個團體就係中國共產黨，阿黃明白未？如果唔明，枉為中國大陸居民咯。中國辦奧運，起碼幾十年只得一次，身為中國人自然樂觀其成，但應以平常心視之，如果抱住「百年屈辱，一朝崛起」之心，但求威水，下下求面子，容不下異類聲音，咁就反映人民尚未成熟，中國尚未真正崛起。