街市男劉晉今周又出動，帶我哋去北角春秧街市買靚餸。街市男話佢細細個就喺呢個街市「蒲」，今日佢間私房菜館的食材，好多都仲係喺呢個街市入貨。上海麵好、福建材料齊全、豆品店係老字號，仲有電車叮叮叮行過做背景，夠料夠情趣，仲響邊處搵？
記者：廖秀娟
攝影：周旭文、陳陶鈞
菜譜及示範：黃色門廚房
掌舵人劉晉（28586555）
京葱肉碎麵
時間：20分鐘
2人份
街市男用振南的獨家上海幼麵做京葱肉碎麵，淥10秒攪掂，又軟又滑；京葱油慢慢滲入麵條，好香、好誘人！
材料
免治牛肉1/2斤、上海麵1束、薑2片、葱1棵、鹽11/4茶匙、京葱1棵、油1/2杯、生抽1湯匙
做法
肉碎
把葱切成三段；燒熱油鑊下葱和薑，轉中火後下牛肉，不斷兜炒約8分鐘，炒至亁身及散開後熄火，下鹽調味備用。
葱油
1.京葱只用白色部份，切幼圈。
2.起鑊下油，油暖後下京葱，不時用鑊鏟兜炒，京葱呈深金黃色即成。
煮麵
1.煲滾水下少許鹽後落麵，以筷子挑散，煮5至10秒即成。
2.倒進大碗中，加葱油1湯匙和生抽，隨意下牛肉拌勻即成。
劉小姐：點解京葱要喺暖油落？
答：滾油會把京葱煮燶，細火慢炸，京葱至會金黃，同將香味滲入油裏面。
雞煲
時間：20分鐘
2人份
湯與料都鮮甜無比，街市男教落的焗雞保鮮嫩法，果然無花假，雞肉夠嫩滑啊！
材料
龍崗雞1隻（約2斤）、玉竹/沙參/淮山各1両、紅蘿蔔1個、粟米1條、海鹽1/2茶匙
做法
1.雞切細件。紅蘿蔔去皮切件；粟米切四段。
2.玉竹、沙參及淮山洗淨，和紅蘿蔔及粟米同放大煲中，加水至7成滿後下海鹽，大火滾沸，轉細火冚蓋煲半小時。
3.把半份雞件倒下，用筷子挑散，轉中火煲至水再滾沸時熄火，冚蓋焗1分鐘，開蓋時即可夾起雞塊進食。
4.吃完後再加另半份雞，依照（3）煮好再食。
黃小姐：市面上有很多不同雞種，究竟有咩分別？
答：龍崗雞肥大啲，通常用來做白切雞；黃油雞比龍崗雞更肥大，用來做炸子雞最好；嘉美同少爺雞是香港雞農改良過的健康雞，前者籠養，肉質嫩滑；後者是走地雞，冇多餘脂肪。
煎蠔餅
時間：20分鐘
2人份
潮式煎蠔餅，番薯粉的軟糯與蠔仔的鮮香，是惹味與口感的好結合。街市即買的福建蠔仔，肚仔脹卜卜，新鮮！
材料
蠔仔1/2斤、幼鹽2湯匙、蒜仔1棵、薑絲1湯匙、蛋1隻、番薯粉3湯匙
做法
1.蠔仔放進筲箕反覆冲洗，分幾次以鹽抓洗，邊洗邊揀走蠔殼，瀝亁擱起。
2.蒜仔切細粒，和蠔仔一起放入碗內，加薑絲、蛋和番薯粉，拌勻成蠔仔漿。
3.燒紅鑊下油，再下蠔餅漿慢火煎，煎至蠔餅轉結實（約2分鐘）。
4.小心用鑊鏟反轉蠔餅，煎2分鐘即成。
陳小姐：蠔仔用鹽洗同用生粉洗有咩分別？
答：用鹽會爽身啲，去到腥味；生粉會黐住啲潺，洗完白啲；其實可先用鹽，再用生粉都得。
蘿蔔燜芋丸
時間：20分鐘
2人份
蘿蔔和芋頭都是舊日農家菜，簡單燜起來，加少少香菜點綴，已經是飽肚又惹味的家常菜。
材料
芋丸1/2斤、豬肉1/2斤、蘿蔔1斤、香菜1束、薑2片、油/鹽各少許
做法
1.豬肉切片；蘿蔔去皮切2厘米厚件；香菜切粒。
2.大火開鑊下油，轉中火後下薑和肉片同炒，下芋丸略炒後再下蘿蔔。
3.下水蓋面，中火冚蓋燜15分鐘，用鑊鏟試蘿蔔是否夠腍。
4.蘿蔔夠腍後熄火，拌入香菜粒再試味，略加鹽調味後上碟。
Diana：福建芋丸係咩嚟㗎？
答：芋丸係芋茸裏面仲有肉碎同少少蝦米餡料的丸子，約$20/斤。
網上重溫
http://cooking.appledaily.com