農夫首次擔正的電影《六樓后座2家屬謝禮》今日上映，他們前晚亮相《蘋果》網站直播節目《娛樂開CHAT》，並帶了戲中好友羅仲謙和田原到來撐場，鄭詩君（C君）更透露在片中最辛苦是要扮人肉可樂樽不停轉，差點轉到嘔！問到他們下次想在電影中嘗試甚麼角色？身形短小精悍的C君說：「想演古裝，要有朝代嗰啲，但做大俠就冇公信力啦，不過，可以乜都試吓。」假如要農夫取代張國榮和梁朝偉拍新版《春光乍洩》，陸永迴避的說：「演員有自知能力，冇就點做。」大家可登入《蘋果》網站 http://ent.appledaily.com隨時重溫節目。
採訪：比華利、懷鈺
攝影：仇志中
化妝：Manyee（農夫）
髮型：Renton（SalonIDE）（農夫）
JackyLeung（ILColpo）（羅仲謙）
服裝：Juice（農夫）
初次見面遭圍毆（旺角 細秋）
細秋：你哋頭先話《六樓后座2家屬謝禮》有場戲好慘，咁成場戲有乜嘢趣事？
C君：我嗰場就講咗喇，你講啦，陸永。
陸永：我嗰場都好慘，唔係，係好凍，又係喺個冰場度，要瞓喺個冰地度，加上又俾棒棒堂攻擊我呀，佢哋仲要真力打落嚟㗎。
主持：真係呀？你哋好大仇口㗎？
陸永：唔係呀！我哋第一次見㗎咋！可能呢啲人夾人啦，其實可以就到位，但真做效果好啲啦……佢哋覺得，不過𠵱家我好番喇。
細秋：我仲想問陸永呢，今次擔正有乜嘢感覺呀？
陸永：我之前做好多臨時演員嘅，今次真係緊張咗好多，因為以前好容易goodtake，好似做張凳咁，今次要做曲棍球喎，難好多。以前冇嘢講吖嘛，而且今次好多嘢講，所以緊張好多。
8月開騷晒舞技（荃灣 Ivy）
Ivy：我想問農夫之前隻碟《風生水起》，係講社會各階層，嚟緊隻碟會有乜嘢意念呀？
C君：新碟會有多啲我哋對唔同嘢嘅觀念。
陸永：上次我哋係講各階層嘅實況，今次就會加多啲自己嘅觀點落去，啲歌係感受性強啲㗎。
Ivy：8月頭咪有個音樂會，想問吓有乜嘢特別嘢睇呀？
C君：我諗我哋嗰個唔係音樂會，係一個騷。我哋有好多表演啦，好多嘢㗎。
陸永：例如一啲好大膽嘅唱歌啦，係真係唱，唔係rap，為咗唱歌我哋走去拜師學藝，仲有我哋會跳舞。
廣東話差成笑柄（Kelvin）
Kelvin：我想問阿謙呀，頭先見到錫嗰場戲只係錫一錫啫，點解報紙話拍咗四個鐘呢？
羅仲謙：呢啲係宣傳伎倆嚟啫，我自己計過，四秒鐘啫。
Kelvin：我想問田原，你廣東話唔好，會唔會同其他演員好難溝通？
田原：有呀，我成日會俾佢哋笑我囉！
主持：笑你乜嘢呀？
田原：例如笑我講交租囉！
農夫：唔係呀，你講得幾好呀，講多次吖！
田原：唔講喇！
