現年28歲的關心妍前晚亮相《蘋果》網站直播節目《娛樂開CHAT》，大家不約而同關心她的感情問題，更催促偶像要早日披嫁衣。問到關心妍可有想過幾多歲結婚？她說：「冇諗過，四、五十歲都會有人要。」她表示在18歲時曾憧憬30歲可出嫁，但當人長大了，感情也要隨緣。至於擇偶條件，關心妍說：「對方一定要係一個好人，除咗心地好，各方面條件都要好，同埋要有幽默感，鍾意搞笑。」大家可登入《蘋果》網站 http://ent.appledaily.com隨時重溫節目。
採訪：懷鈺、林惠卿 攝影：陳順禎
髮型：AbbyChoi（Hair） 化妝：OmixB
網友寫歌詞 大埔 鬼二
鬼二：想問吓你平時咁唔定時工作，會唔會對皮膚有影響㗎！
關心妍：我好定時瞓覺㗎，因為我淨係唱歌，又唔使拍戲、拍劇，所以啲時間唔會顛倒得好緊要，除咗拍MV啦，錄音我都係下晝3點開始，頂盡錄到夜晚8點，所以都好多時間瞓。
鬼二：想問吓新碟會唔會有新嘢，因為之前知你喺網上面搵人寫詞呀、作曲呀？
關心妍：之前喺網上面搞咗個campaign，叫一啲有興趣作曲填詞嘅人，可以交作品上嚟，最後就搵到一隻歌擺咗落我呢隻碟度。可能遲啲再搞拍MV比賽啦，大家可以擺啲片喺網上面畀大家睇吓，我覺得可以喺網上做多啲嘢啦。
食魚護肌膚 沙田 Deseree
Deseree：Hello，我想問吓食啲乜嘢可以令皮膚靚啲？
關心妍：你係乜嘢血型㗎？
Deseree：我係O型㗎，同你一樣。
關心妍：試吓同我一樣食紅肉啦！食魚啦！三文魚、吞拿魚呀，其實對皮膚好好㗎，仲有，魚入面啲魚油，食完成塊面係會「令」啲！
主持：怕唔怕食生㗎？
關心妍：唔怕，不過食生嘢要𡁻耐啲囉，因為生嘢難消化，所以要𡁻爛啲。
Deseree：我仲想問你食乜嘢冇肚腩？
關心妍：唔得呀，食乜嘢都有肚腩㗎！
