曼聯球星朗尼同女友高蓮嘅6月婚禮，籌備工作一直懶神秘，結果騎騎呢呢得啖笑。好似周三英國《太陽報》就披露，朗尼喺登記文件職業一欄出錯，將職業球員嘅"Professional（職業）串多咗個"f"，變成"Proffessional"！
專機接送目的地保密
如果文件由朗尼自己填，佢中五都未畢業，英國國歌都唔識唱，平日又鍾意爆粗，填form嗰刻舊病復發，我手寫我口多咗個佢最鍾意嘅"f"字，好正常啫！不過高蓮明知未來老公盲字唔識多個，點解唔幫朗尼填表或覆核一次？而且高蓮喺職業嗰欄填上新聞工作者，斷估唔會唔識串"Professional"啩！可見高蓮對朗尼都係唔多體貼㗎啦！
其實，呢對騎呢拖友從宣佈結婚嗰刻起，已經搞到風風雨雨（見附表）。好似高蓮初初話唔請碧咸夫婦，結果搞到要向維多莉亞道歉。又話婚禮當日會派專機接送，不過目的地至落機嗰刻先會知。男方朗尼得父母同親兄弟可以參加，其他親戚？唔好意思，「冇得招呼」！
《太陽報》周三同時踢爆婚禮會喺意大利嘅熱那亞附近舉行婚禮，我求大俠覺得到時肯定秉承一直以來嘅騎呢特色。讀者們大家即管發揮想象力，牧師會唔會係來自英國嘅同胞戇豆先生呢？唔知意大利新任總理貝盧斯科尼又會唔會抽空出席，擔任演講嘉賓呢？
大家都知京奧聖火傳到風風火火，6月嗰陣正值內地最為亢奮之時，希望呢排朗尼同高蓮唔會講錯嘢辣㷫班愛國志士。唔係到時婚禮現場湧現數千名抗議憤青，傳來陣陣殺氣騰騰嘅《義勇軍進行曲》，抵制英國貨之聲此起彼落，就認真掃興啦！
朗尼、高蓮騎呢事件簿
1〉唔請碧咸夫婦，結果要道歉
2〉朗尼除父母和親兄弟外，其餘親戚不在邀請之列
3〉婚禮地點保密
4〉60位親友請着黑色或白色西裝
5〉唔准着愛華頓球衣
6〉婚禮可能分兩次進行