全新EliseSC　減磅出擊

Lotus一出場，擺明就一副戰鬥格，愛性能、講操控者絕對為Lotus而狂，噚日至正式喺香港曝光嘅超新跑——EliseSC肯定又再辣㷫一眾Fans。SC指Supercharged，有呢個配置，唔使我講都知佢係部高性能辣車啦！今次全新車款仲要減磅出擊，絕對飆得更狂！

記者：梁美甜
攝影：林栢鈞
模特兒：Michel

輕磅剽悍　辣住飆

全新EliseSC外形同08款Elise猶如雙生兒，最大分別應該係車尾全新嘅擾流板、專為SC而設計嘅獨特鋁合金輪圈，及新設計車頭高燈。EliseSC最強悍係佢副全新開發嘅機械增壓引擎，馬力輸出遠遠拋離Elise，最高可達200匹。其實SC搭配嘅1.8公升2-ZZVVTL-i引擎與EliseR相若，只係加裝咗機械增壓器，機械增壓器ExigeS都有配備，但SC就捨棄中央冷卻器裝置，因而輕上幾公斤，全車僅重870公斤。車身輕咗，馬力輸出大咗，SC嘅後輪亦因而加闊，藉以加強抓地性，當扭力大時，配合尾翼適時發揮作用，行車頓然穩定順暢，即使高速掟彎，都有驚人嘅抓着性，鍾意高度操控同追求性能表現嘅車迷一定愛死這種行車表現！

a. 中置尾喉，跑車格局，超型！

b. 車尾巨型風琴式通風口，辣車本色，亦係Lotus招牌設計。

c. 新式高燈有別於Elise。

d. SC外形同Elise近似，惟新式胎軨表明身份。

加強內裝　飆得爽

鍾意Lotus嘅人都知，Lotus所有車都係棍波車，即係話，純為追求機械操控、汽車性能同挑戰個人駕駛技術嘅人而設，車身雖不至於全無電子儀器設備，但絕對唔係Lotus所專注嘅地方，亦因此，內裝上無所謂豪華舒適嘅配備。
不過全新SC都喺內櫳下過功夫，全車真皮跑椅，注意，並非裝模作樣增跑味之流，所以不可能坐得嘆，不過就一定較之前舒服唔少，而且承托力十足。改用按鈕式嘅啓動引擎方式以及中控錶板上稍加修飾，中控台正下方則加裝杯架，方便放置飲料等等，整體而言更見舒適方便。較特別嘅係全新SC喺椅後裝有隔音板，為咩？咪就係可以減低嘈到坼天嘅引擎聲對駕駛者嘅影響囉。不過個人覺得，開得Lotus，追求得高速嘅操控感，又點可以少咗轟轟響嘅引擎聲？越轟越興奮啦！