𡃁界女神Angelababy及緋聞男友William，前晚一同出席在銅鑼灣舉行的活動，兩人同場非常有默契，異口同聲承認只是好友。Angelababy大方表示與對方會繼續交往、去街食飯，反而是William扭扭擰擰，連做訪問也不願意一起，真正是男女大不同呢！
余安安與細女李文騫、馬詩慧與兩個囡囡、鍾舒漫等，前晚出席在銅鑼灣舉行的PFFlyers、Pataugas等波鞋活動。𡃁界女神Angelababy長了一面暗瘡，她與緋聞男友SunBoy'z成員William同場相遇，兩人在台上雖然有交流傾談，但當記者提議兩人一同接受訪問時，William一面尷尬，而且態度扭擰地拒絕，最後兩人惟有分開做訪問。
成日約埋行街
Angelababy面對緋聞男友，她表示絕不尷尬，她說：「傳緋聞之前我哋已經識得，間中我哋都會傾偈，又試過一齊做嘢，大家係好朋友。」有傳兩人已經共賦同居？她說：「唔係呀，我係自己住㗎。」她續說：「我哋成日約埋一齊行街，又會得閒就講吓電話，除咗佢我冇乜其他男性朋友。」問到他對男朋友的定義？她說：「如果做得男女朋友，即係好多嘢要對對方負責囉！」
另一邊廂的William，則死撐自己沒有尷尬，他說：「之前都知佢會嚟，影合照都冇所謂，我哋係正常社交圈子嘅朋友。」
安安掛心女兒
此外，余安安透露細女李文騫明年會獨自去美國升學，問她不擔心女兒學壞嗎？她說：「每個地方都有壞人，我都會擔心，但係我對個女好有信心，因為佢思想都幾成熟。」她又謂有模特兒公司向她的女兒招手，她說：「我唔會阻止她入娛樂圈，例如做吓part-time模特兒同慈善騷，總之佢鍾意去試都可以，但全職就唔好住啦。」
採訪：羅慧敏 攝影：陳慧安
