賓架W之愛女在波士頓讀音樂，畢業後鍾意唱歌劇，賓架W因此亦好鍾意聽歌劇，每有佢心目中之音樂會，必定叫齊成班朋友去聽。呢日佢百忙中打電話嚟，適逢左丁山去咗洗手，聽唔到。幾分鐘後立即回電，已經搵唔到佢，秘書話佢有幾個會要開喎。後來收到佢嘅短訊，話四月三十日晚上一定要去文化中心音樂廳聽美國著名女中音DenyceGraves（丹妮絲．格費絲）獨唱會。左丁山不知格費絲係何許人也，於是上網一查，嘩，原來此姝乃當今美國歌劇界大紅人，四十四歲，畀USAToday讚到天上有地下無，話佢可以成為二十一世紀超級巨星唱「卡門」技驚四座，二○○五年一月喬治布殊第二次就任總統，宣誓典禮上主唱美國國歌嘅就係呢位女士，二○○一年九一一之後在紐約、華盛頓悼念活動上，主唱嘅又係佢，其他表演，當然多到數唔晒。
我等非音樂界中人，若非賓架W知會，實在唔知道格費絲來香港獻藝，日日去文化中心行嘅朋友，就會知道嘅。佢嘅票價同杜鳴高差得幾遠噃，最高票價只係八百八十元，最低價係一百八十元，直情係街坊價。問清楚一位對音樂歌劇有認識嘅朋友，佢話：「香港歌劇院OperaHongKong有香港歌劇王子莫華倫大力支撐，莫華倫聽講與格費絲甚有交情，故此請得佢郁，而且演出費可能係友誼價錢㖭。」
原來如此，做事無分大小，都是講主腦人嘅交情嘅，講人脈網絡嘅，否則就講明碼實價，市場交易。本來以後者最為亁淨利落，最無包袱，講交情，講少啲錢，就會欠下人情債，可大可小，有時甚至貴到不能負擔。但係，喺香港講文化藝術，屬陽春白雪之類，市場細小，下下講真金白銀，冇得搞咯，主事人唯有各師各法，久唔久就打人情牌。一位文化版編輯對左丁山開玩笑咁講：「我哋對OperaHongKong好同情嘅，如果許仕仁做特首，重視歌劇多啲，畀多啲政府資助，OperaHongKong就唔使捱得咁苦啦！」講完之後，在自由黨酒會上碰到許老爺，老爺聽見DenyceGraves個名，立即豎起大姆指，話四月三十日晚上會在文化中心出現喎。