落閘！放狗！藍鑽石上次早飛頭條貼韋根僅保本離場（不過細嗰3場中晒，有受惠啩？），但唔會改變季尾捧有戰意球隊嘅大路思維，伯明翰正宗門口狗，周六主場對掛住歐聯嘅「紅軍」利物浦，開個平手鬼盤，一於咬住主隊唔放，博伯明翰贏埋。藍鑽石
或者你會問，伯明翰上場喺中部打吡輸得咁甘，唔係仲諗啩？係，因為伯明翰排緊尾3，形勢冇得再差，最後3場簡直可以當盃賽決賽咁踢；其次佢哋確係正宗門口狗，離開自己地頭衰到貼，但喺聖安德魯主場出賽就真係幾惡，贏過熱刺、曼城，而阿仙奴、愛華頓嚟到都和波失分，捧佢對家，因住被反咬一啖。
伯明翰近期主要靠阿根廷前鋒莫路沙拉廸做嘢，近5場比賽入4球，而佢上場主場聯賽對愛華頓入嘅靚罰球，波迷應有一定印象，就算隊波續有中場戴文莊臣停賽，對紅軍都坐和望贏。前個禮拜，我就因為撐好友畢傑該場推介嘅伯明翰「大」而擂台唔見咗1,000分，希望今次同伯明翰一齊反底。
紅軍留力用二線兵
禮拜二紅軍懷斯嗰球驚世烏龍波，相信𠵱家仲有波迷講緊。紅軍喺聯賽坐硬「4哥」位，今次擺明會好似上星期作客富咸咁派副選，即係高治、賓納呢類二線兵會落場，話唔定嗰個黑仔王懷斯都有份，至於奧利里奧因傷要唞3周，今季唔使預佢囉。班後備兵質素當然唔差，但今次對手主場水準高於富咸，「利記2隊」未必可再逞強。睇莊家開個咁嘅盤，擺明唔信紅軍。
最後講埋對賽數據，雖然伯明翰前年喺英足盃主場吞過利物浦7蛋，輸得好甘，但聯賽對戰成績一啲都唔失禮，近4次2勝1和1負，真係怕你有牙。講惡，今場隻門口狗會惡得出樣，波膽首選主隊贏1:0。
門口狗近期主場咬人事件
12/04/08和愛華頓1:1
29/03/08勝曼城3:1
01/03/08勝熱刺4:1
23/02/08和阿仙奴2:2
早飛王貼士
星期六26伯明翰vs利物浦
首選：伯明翰（平）
次選：伯明翰[半和]（2.05）
冷選：伯明翰勝1:0（7）
《周末早飛超級重心》
撐富咸向曼城攞分
星期六27
曼城vs富咸1:1（6.5倍）
話就話仲有機會，曼城爭取踢本季歐協盃嘅機會名存實亡，而呢隊波過去10場主場比賽都只係入過10球咁大把，信唔過。聽領隊艾歷臣近期嘅言論，對前途愛理不理咁，唔通預咗俾他信炒？富咸上場主場對利物浦俾人煎雙蛋，想留級最後3場就要贏晒。呢隊波近期輸完一場後翌仗一定攞到分，信攤路嘅話更加要撐一撐。
信「黑貓」執到「堡」
星期六28
新特蘭vs米杜士堡2:1（8倍）
兩隊波護級形勢唔算太差，但始終未安全。近日click入新特蘭官方網，睇見門將哥頓話呢場波非勝不可，初初唔明，原來係「黑貓」喺東北打吡慘敗於紐卡素腳下後，士氣差，個個磨拳擦掌要贏番另一場打吡喎。講近況，米杜士堡未必差得過隻貓，不過加利奧尼爾長唞對隊波嘅影響其實幾大。頭條信隻狗，喺度信埋隻貓。
敲熱刺保頓做「大」騷
星期六29
熱刺vs保頓2:2（13倍）
上星期我話嘅熱刺「疑似騷」做唔成，不過隊波冇心理包袱就梗㗎啦，呢次贏唔贏到護級嘅保頓，我唔敢講，但首選1.72倍「大」。熱刺今季主場聯賽未試過冇波入，保頓乘上場贏米杜士堡之勇肯定搶攻爭取護級，適逢前鋒奇雲戴維斯復出，對住鬆散嘅熱刺後防，保頓應該有波入。上季保頓作客熱刺輸1:4，今次都值博「大」。