香港CoffeeShop通街係，Starbucks多過七仔，梗有一間喺左近，但我實在接受唔到一大杯用多奶多水冲成的「咖啡」，仲要有人攞支攪棍當飲管，好失禮！以往最頂級係藍山咖啡，但大量生產後質素已經大降，講到香濃，全城最貴的貓屎咖啡賣$220一杯，我抱着懷疑的心，拉埋飲食專家朱文俊（Gary）一試。
記者：黃家欣
攝影：楊錦文、林栢鈞
朱文俊（Gary）
飲食專欄作家，網絡電台節目《今朝有酒》主持人，14年前開始瘋狂愛上咖啡，每日最少要飲4、5杯，擁有一部十三萬的Conti半自動咖啡機，只冲自己的HouseBlend。
味似玻璃易碎易散
講咖啡，貓屎當旺。在四季酒店Caprice飲一小杯的貓屎咖啡Espresso要$220，如此矜貴的背後居然有個核突出身。貓屎咖啡原名叫KopiLuwak，因為咖啡豆是來自印尼一種叫Luwak的麝香貓糞便。麝香貓天生愛挑優質咖啡果實來吃，但腸胃受不了堅硬的咖啡豆內層，咖啡豆於是隨糞便排出體外，而後來有人發現將Luwak糞便中的咖啡豆冲泡出來竟然香濃甘甜，皆因一般咖啡苦味都是來自蛋白質，而貓屎咖啡豆在麝香貓肚內被胃酸同酵素將蛋白質都分解了，所以咖啡全無苦味，口味獨特。
聞落，貓屎咖啡的生豆全無咖啡香氣，只有一大陣「藥材味」，呢陣係咖啡豆排出時經過Luwak生殖器而沾到的麝香油味道，不過冲泡出來之後，這味就消失了，反而聞到好Fresh的果酸味，望落面層有陣金黃色Creama，唔算太厚，飲落個Body好濃，第一口酸味很濃，但喝後的aftertaste才是主菜。Gary：「入口有一陣好舒服的果酸味，順喉唔會澀，不過佢嘅香氣同酸度都好似玻璃咁，易碎易散，好快流失，但佢最突出係aftertaste，留喺口腔好長時間。」飲Espresso一定要趁熱飲晒，只係一、兩分鐘嘅事，反而留喺口的aftertaste先係慢慢「嗒」，Luwak的餘味，即使飲幾杯清水後仍然強烈，香純的咖啡味亦不會嚡口。
貓屎味道複製唔到
有人覺得由糞便找出來的咖啡豆難以接受，事實上因為產量少（每年只有300至400公斤），所以貓屎咖啡身價極高，而且點都複製唔到類似味道，Gary：「Naturalpicking好緊要，其他動物根本唔識好似Luwak咁專揀靚咖啡果食。」獨特味道一飲就試得出，唔同藍山越出越差，只一味得個酸字，連超級市場都有十幾蚊一包「BlueMountainStyle」咖啡豆，點會有好嘢。而呢杯Luwak喺香港只有五個地方飲得到，全部都係高級餐廳同五星級酒店。一杯最多只有三啖的LuwakEspresso在Caprice要$220，但Gary都覺得超值：「咖啡本身當然係好，但襯埋環境、仲有碟小食，好過去Starbucks飲一杯用水同奶冲嘅咖啡，咁低成本製作都收你三十幾蚊杯，Starbucks賺得咪仲多。」香港人欣賞咖啡的人少，CoffeeShop更加做得求其，Gary：「試過order一杯DoubleEspresso，佢真係畀一杯大一倍嘅咖啡我，DoubleEspresso原本係兩倍粉冲一杯，佢變成兩杯水仲一包粉，唉我以後都係飲番Espresso算啦。」
無好嘅咖啡店，接觸唔到好咖啡，自然就唔識欣賞，Gary：「飲咖啡可以落少少糖，但唔可以落奶，咖啡落奶就只得奶味，好似紅酒溝汽水咁荒謬。」意大利人識飲咖啡，係因為隨街都有好咖啡，香港搵杯好咖啡都難，自然少人識欣賞。此乃惡性循環。
小店HouseBlend非洲風味
貓屎咖啡唔係度度有得飲，而且價錢唔平，實在不能隨便上癮，於是走去找Felix間Cafe──CafeCorridor請教佢，睇吓咖啡達人有何推介，Felix：「我都飲過貓屎咖啡，係我一個喺台灣代理呢隻咖啡嘅朋友帶畀我，佢口味係好獨特同舒服，的確好得人鍾意，不過貓屎炒到去天價，我覺得好大程度都係因為麝香貓屎的故事，令人覺得佢傳奇又矜貴，台灣朋友話，其實唔係每粒都係天然由麝香貓屎度嚟。」藍山咖啡價錢同質素又係唔合比例，只係日本人熱搶，先將藍山越炒越貴。Felix：「飲咖啡都係睇個人口味，愛飲Latte、Mocha都無問題，最緊要係Relax，我自己當年就因為鍾意CoffeeShop悠閒嘅感覺而愛上咖啡，如果要去酒店飲貴價咖啡，我寧願揀去小店飲自家調配的HouseBlend。」一間CoffeeShop的HouseBlend通常係店主以自己口味混合不同咖啡豆而調的配方，最能反應店的性格，Felix就有四種HouseBlend：「四種入面都一定混入非洲咖啡豆，我鍾意佢嘅咖啡豆因為非洲係咖啡發源地，種植同製作咖啡豆都有悠久歷史同經驗，有忠於原著的感覺。冲出嚟咖啡好有Character，有烤烘香味、果仁香氣，果酸度的平衡都好。」Felix咖啡知識豐富，仲會細心咁依據我嘅口味嚟冲咖啡，每次到他的Cafe，都好似返到屋企咁舒服，不過我仲係好回味貓屎咖啡的餘香，可能我心底都係愛虛榮。
最新回應
Joe：越來越多人識得貓屎咖啡，Caprice每日可賣出8杯，Espresso杯身較薄，因為我哋用較矜貴的骨瓷器具，感覺優雅啲。
Leona：鍾意飲coffee就自然想研究埋佢哋冲法等等，有本書叫《CoffeeBasics》由KevinKnox等人編寫，內容較詳盡，幾啱入門睇﹗
Caprice（31968860）
中環四季酒店6樓
CafeCorridor（28922927）
銅鑼灣羅素街26號A地下