唔睇唔知，𠵱家啲殯儀服務原來好多花款，小妹噚日去咗澳門，參觀咗亞洲首個大型殯儀博覽會，大開眼界。博覽會集合咗中、外200幾間殯儀公司，賓虛咁嘅場面，有間港產嘅聚福寶都幾有諗頭，推出咗一個超越時空、網上直播葬禮嘅一條龍服務，仲話係全港首創㖭。
聚福寶嘅公關姐姐Maggie話，香港寸金尺土，好難搵到地方土葬，唔少人轉移返內地搵墓地，但要中港兩地走都幾煩人，公司有見及此，於是推出一個叫做「拜祭現場，網上直播」嘅服務，免親友拜祭時舟車勞頓之苦。
Maggie話，佢哋喺廣東省四會巿江谷鎮新開咗一個華僑陵園，供港人選擇。舉行葬禮嗰日，死者有啲親屬可能嚟唔到現場，公司會透過電腦網絡，將葬禮場面即時傳送畀身在外地、未能親臨現場嘅親屬睇，參加一個跨越時空嘅葬禮。𠵱家仲出咗啲殯儀套餐，由選墓地、葬禮至網上直播一條龍服務，收費68,800元起。
Maggie仲話，如果啲親人唔得閒嚟掃墓都唔緊要，佢哋會派專人到墓地代勞燒衣，都會即場喺網上直播。計小妹話，佢哋嘅服務對日理萬機嘅港人係幾方便，但連掃墓都假手於人，先人泉下有知，都唔知會點諗。
逢周一至周四刊出