和黃（013）舊年賣資產、賣股票，加埋3G生意有改善，全年賺超過300億銀，長和系主席李嘉誠「愛將」、和黃董事總經理霍建寧咁落力搞好盤生意，舊年重新有人工加，（霍建寧06年及05年同樣𢭃1.3億元人工），07年一加就13%，全年𢭃1.47億銀人工，其中，基本薪酬冇變，主要係花紅多咗14.3%，有1.36億元。
霍建寧無驚無險，再度成為和黃最搵錢大班，之但係，打工皇帝呢個位要讓坐，畀惠理集團（806）創辦人兼主席謝清海攞咗，霍大班跌落第二位。至於排第三同第四分別係小超人李澤鉅同中信泰富（267）主席榮智健（見表一）。
唔睇唔知，謝清海舊年人工有成2.5億銀，淨係花紅都有2.34億銀，認真厲害。不過，呢種情況喺投資公司或者投資銀行其實好普遍，唔係又點會喺每年年初，都聽到啲外資投資銀行家派成年人工做花紅咁誇張。查實謝清海06年已經𢭃緊1.5億銀，但就冇人知，到惠理舊年上市，公開晒啲資料先知得咁清楚啫。
不過咁，惠理舊年底投資咗2.34億銀落面臨清盤嘅甘泉航空身上，謝清海08年份花紅唔知會唔會減啲呢？
小超人共𢭃9677萬
另外，若單計小超人李澤鉅喺長實（001）𢭃嘅4514萬銀人工，佢自然唔入打工皇帝榜啦，之但係連埋和黃同長江基建（1038）𢭃嘅人工，佢喺長和系共𢭃9677.5萬銀，應該排第三位，多過榮智健同范鴻齡㗎。
講番和黃本07年年報，除了披露咗霍大班嘅人工，大家都會望吓誠哥喺主席報告有冇金石良言。可惜，誠哥今次只係簡單講吓美國宏觀情況，指次按危機、樓市下挫，隨之而來嘅經濟衰退壓力，可能對美國經濟帶來不利影響。大家可能要等到5月22日長和系開股東會時，先聽到誠哥訓話啦。
電郵：mailto:[email protected]
李澤鉅人工
市公司：長實（001） 4,514.0萬元
市公司：和黃（013） 4,056.0萬元
市公司：長建（1038） 1,107.5萬元
合共：9,677.5萬元
本港上市公司高層薪酬榜
謝清海
所屬上巿公司：惠理集團（806） 人工（港銀）：2.5359億
霍建寧
所屬上巿公司：和黃（013） 人工（港銀）：1.4798億
李澤鉅
所屬上巿公司：長和系 人工（港銀）：9,677萬
榮智健
所屬上巿公司：中信泰富（267） 人工（港銀）：6,699萬
范鴻齡
所屬上巿公司：中信泰富（267） 人工（港銀）：5,667萬