由業界最敢言創作人板垣伴信掌舵，自去年TGS前夕揭開神秘面紗至今都係廣受追捧嘅《忍者外傳2》（NinjaGaiden2），唔經唔覺仲有個多月就會推出，好多新料亦喺呢段時間蒲頭。亦因佢排喺6月頭呢個暑假第一檔，負責全球發行嘅微軟固然出盡力大做宣傳，連熱爆全城嘅Facebook都玩埋，以讓大家知道隻Game究竟有幾犀利，斬到甩皮甩骨依然唔令人反感，仲想親手落場劈埋一份㖭！
文：陳福榮
挑戰血腥美學極限
講求爽快動作與上乘官能刺激嘅作品，近年只有《忍外》同《Bio4》得到歐美玩家誠心臣服，如今《忍外》更從XBOX進化至機能強勁好多嘅XB360，畫面變靚啲已經係最基本嘅要求。
「DOA之父」板垣伴信多年來最叻搞搞新意思，相隔四年佢決定將《忍外2》整得更變態、更有血有肉，所指嘅係任何敵人都可以俾你斬到斷手斷腳兼甩頭，斷肢方法因應武器而改變，難度方面板垣仲嫌之前未夠難，於是落多幾錢肉緊整到嘍囉都會發癲，搞到個個試玩完嗌晒救命。如果大家思維仲停留喺《鬼武者》之類嘅EasyJob，咁本作真係可以挑戰閣下嘅忍耐力：忍住唔爆粗嘅能力！
武器增多效果華麗
其實上集《忍外》都已經唔算少武器，連埋加強版《NGBlack》同PS3《NGSigma》真係逐樣操都玩到手軟，不過好老實有邊個會嫌多㗎？就算拎咗唔用老虎都要款式夠多啦，否則硬係覺得偷工減料咁。雖然唔知仲有冇隱藏嘢未發表，但已確認嘅新武器至少有手腳齊齊裝備嘅鉤爪、有啲似上集巨乳女伴Rachel嗰把大鐮刀、攻守合一嘅枴，仲有將人打爆頭嘅流星鎚，連同忍者不能缺少嘅單手劍及雙刀等，完全可因應個人喜好揀選。筆者就鍾情流星鎚多啲，貪佢打得夠遠又有型，夠晒過癮。
試玩版5月殺到
基於直至目前為止，Tecmo甚至「爛面佬」都冇提過今後會唔會似《~Sigma》咁求其加啲嘢移植去PS3，但當諗起微軟出錢出力包晒《忍外2》全球發行嚟做，咁樣玩兩頭住家嘅可能性未必會高。所以呢隻標榜獨家只為XB360而設嘅超大作，有關方面當然相當重視，首先會喺5月內推出試版俾人單撈，估計係舊年TGS用嚟做Demo嗰關水都，因為話晒完成度夠高，又有大佬打。假如過往未玩過《忍外》，驚接受唔到太過殘忍或者怕難玩，不妨試咗先至決定入唔入貨。但絕大部份之前玩過《忍外》嘅人均豎起拇指大讚，睇怕第二集都唔會無端端跌Watt嘅，起碼班鬼仔𠵱家對佢嘅期待一啲都唔低於《GTA4》就知佢幾猛料啦！
網上對決全球展開
為求全面造勢，微軟會由4月23日起喺全球大搞《忍外2》嘅網上對決活動，招募各界精英成為忍者接受真正比拼。屆時只要登入網址 http://www.xbox.com/zh-HK/games/splash/n/ninjagaiden2/進行登記，除咗可以下載精美壁紙同螢幕保謢程式之外，仲可以搵朋友一齊玩迷你遊戲互相較量，而且螢幕保謢程式會因應大家發放嘅「比武帖」數量以及迷你遊戲得分而產生變化，最高得分者仲有機會贏得XB360Elite版主機，真係未出Game都要怒煲佢啦！
此外，呢個網上對決活動亦會現身潮人必玩嘅Facebook，取名「Facebook忍者排行榜」嘅小程式會顯示各個玩家嘅迷你遊戲得分和排名，想贏Elite版主機就一定要定時昅實。
PROFILE
機種：XB360
廠商：微軟/Tecmo
類型：ACT
人數：1人
日期：6月3日
價格：未定
