中文傳媒報導西藏問題，好少有《亞洲週刊》咁客觀與咁詳細，上一期《亞洲週刊》（四月十八日收到）就有幾篇文章，包括沈旭暉《閱讀西藏的兩重遊戲理論》、杜立中《三藩市奧運火炬混戰現場》，丁果、郭一平《專訪達賴喇嘛》，林達《何不建立西藏文化特區》、許知遠《奧運與西藏的類比》，篇篇值得一看，尤其是中文媒體好少有機會訪問達賴喇嘛，呢次《亞洲週刊》趁達賴到西雅圖參加為期五日嘅「慈悲心種子」演講活動，與達賴會晤，達賴講到一國兩制，以香港為例，可以用在西藏談判上；達賴亦講到中央政府考慮到香港人口密度太高，限制內地移民香港，西藏也可否如此，限制漢人遷入？睇嚟達賴對香港情況，平時都有留意到，佢又重申絕不反華，絕不反奧運。《亞洲週刊》話有憤怒華人到場抗議達賴，但同時有十萬以上美國人參加達賴弘法講座，可見大家對達賴嘅認知，有好大鴻溝。但達賴是否可以號召所有西藏人呢？未必，沈旭暉文章就話西藏有唔少「兩重遊戲」，達賴與北京都冇單方面和解能力。
西藏情況如此複雜、難搞，海外藏人反奧運火炬，就取得預期效果。如杜立中報道：「華人沒看到奧運聖火，聖火被迫像小偷一樣悄悄溜走，他們感到失望、不公平和憤怒。」奧運火炬在巴黎之後，去到邊都似係做一場戲，緊張地來，秘密地走了，全無歡樂和平氣氛，與當初中國希望宣揚京奧，宣揚國威嘅目的，相差甚遠。早知係咁，火炬只在中國各省傳遞仲好。
五月二號奧運火炬在香港傳遞，唔會好似喺印度咁收埋唔畀人睇（萬五軍警，幾百公眾）喇啩，香港應該冇人搗亂嘅。但又有咁啱得咁蹺，老牌影星米亞花露（MiaFarrow，一九六八年《魔鬼怪嬰》Rosemary'sBaby女主角）到時會嚟到香港，會在五月二日中午在FCC舉行午餐演講，題目就係DarfurandtheOlympics，米亞花露係熱心關注蘇丹種族屠殺嘅國際名人，係DreamforDarfur呢個組織嘅主席，勸服咗大導演史匹堡退出唔做京奧藝術顧問，向中國施壓，要中國關注Darfur危機。五月二號米亞花露演講達科與京奧，十分敏感，值得留意。