下星期正式開幕的「小小世界」，位於幻想世界內，坐在船上欣賞兩岸13個不同國家的場景，還會因應場景播放廣東話、菲律賓塔加拉語等9種語言的《世界真細小》。9分鐘的船程，可以用目不暇給來形容，個頭要左擰右擰，仲要眈天望天花的裝飾等，視覺幾豐富，去到群島景，還飄來椰子香，搞鬼！自己未去過其他的「小小世界」，唔識比較，齋看周遭小朋友睇到Ｖ嘩咁叫，相信都OK！
各位最關心的中國場景，有雜耍、舞獅等木偶，仲有隻紅色眼皮嘅熊貓（有啲恐怖！），都幾有親切感。視覺享受可惜聽覺受罪，因為另一邊係韓國景，你兩邊耳同時會聽國語、廣東話及韓文，嘈到只係聽到一堆噪音，搞到有啲精神分裂咁！