上市公司白花油（239）最近經歷咗唔少風風雨雨，皆因佢哋前行政總裁、「白花油王子」顏福偉，被法庭裁定兩項非禮男的士司機罪名成立，搞到顏福偉喺啱啱過咗嘅禮拜一，要宣佈自願停任行政總裁一職，但就留任做執董。
噚日白花油出咗份07年度業績，華華梗要第一時間昅昅，留意吓白花油最新有乜搞作，就喺主席報告一欄，發現原來佢哋舊年喺學校，搞咗個巡迴教育劇場，成績都唔錯，所以嚟緊呢年，佢哋會再搞新一輪學校巡迴教育劇場，宣揚「善用時間，切勿沉迷」嘅訊息，究竟沉迷啲乜？都係想叫啲學生哥咪沉迷電腦遊戲，同埋網上世界啫。
教育下一代，咁有意義，華華梗係舉腳贊成啦，話晒企業除咗要盡社會責任，點都要顧吓形象，宣揚健康正面嘅訊息，個活動應該可以為白花油王子攞番啲分。