日前先後為大家介紹過今屆北京車展展出嘅多款新SUV同SuperCar，今日終於輪到豪華房車啦！當中最值得一睇嘅，就係賣超豪氣派，身價過千萬，兼且有人訂車先製造嘅MaybachLandaulet。此外，變得更年輕更豪嘅新一代NissanTeana亦喺場中作全球首展！
記者：鄭丹、龍影
攝影：梁希
鳴謝：M.BenzHK、BMWHK、AudiHK
MaybachLandaulet最豪開篷房車
德國Maybach豪華房車可以話係車壇中嘅極品，唔少商賈富豪都希望可以一嚐擁有佢嘅滋味。今次廠方展出佢哋旗下身價過千萬嘅Landaulet開篷豪華房車！同其他硬頂版嘅Maybach房車一樣，呢款後排採用半開篷設計嘅Landaulet，歐洲售價為900,000歐元，折合港幣約11,000,000！佢嘅外觀同硬頂版好相似，叫人眼前一亮嘅係，原來後半部車頂可以整塊趟開，車上嘅豪華設備當然可按用家要求製作，豪房氣派同開篷樂趣一次過有齊。另外，由於新車僅喺有用家Order嘅情況下先製造，亦因而增加咗佢嘅矜貴程度。
NissanTeana首度亮相
走中型豪華房車路線嘅NissanCefiro，喺日本及國內被稱為Teana，不過兩者都大受車迷歡迎。喺今屆北京車展，負責國內生產Nissan車系嘅東風日產展台，就展出咗新一代Teana，而且仲要係全球首展㖭！新一代Teana，車身尺碼明顯比舊有型號大一截，線條亦變得同ToyotaCamry一樣咁有肌肉感，令新車擺脫咗一直以嚟嘅成熟形象。同時廠方仲特別安排有2.0公升、2.5公升及3.0公升版本供選擇，以滿足唔同車迷嘅要求。
LandRoverLRX大變瞼
今年係LandRover成立60周年嘅大日子，廠方展出咗全線車系嘅同時，亦讓旗下最新嘅LRX概念車亮相！同其他LandRover車系唔同嘅LRX概念車，車體設計流線，有啲似Coupe跑車，個人覺得佢型到震。此外，LRX仲配備咗廠方獨有嘅HillDescentControl同TerrainResponse系統，仲要係升級版，肯定喺任何路面都如履平地啦。
Mazda6熱潮北上
剛啱喺香港推出，而且仲掀起一陣搶購潮嘅全新第二代Mazda6就以今屆北京車展為首次踏足中國嘅舞台。外形設計流線，車廂鋪排一樣煥然一新。當然闊落嘅車廂空間都係新車嘅賣點所在啦！
JaguarXF伸縮波棍搶鏡
另一款早前已經喺香港登場嘅英國JaguarXF，亦有喺車展會場出現。佢同香港熱賣中嘅款式相近似，一樣都係以豪華頂級見稱，而識得伸縮嘅ZF6前速半自動波箱同埋着車嗰陣會自動翻開嘅冷氣風口，都令在場車迷無不稱奇。
紅旗HQ3國產大皇冠
最為港人所熟悉嘅國內汽車品牌，肯定非紅旗莫屬，因為佢哋一直有生產各式各樣嘅豪華房車。今次呢款HQ3，同日本Toyota嘅CrownMajesta好相似，唔止車頭車尾似十足，車廂內裝亦90%雷同，若然唔係個廠徽唔同咗，大家都好難分得出佢哋嘅身份。
長安志翔中型車新貴
號稱係自主研發嘅長安志翔中型豪華房車，明顯由內到外都擁有自己嘅Style。個人覺得部車外觀有時代感，無咗國產車嗰種呆笨感覺，車廂嘅裝嵌手工亦有改善㖭！動力則源自一台2.0公升引擎，隨後亦會推出1.6及1.8公升版本。
長城炫麗混合體小車
我同隨行嘅攝影師見到呢款長城炫麗嗰陣，即時就諗起Toyota嘅Yaris同ist。事關佢車頭用咗酷似Yaris嘅設計，而車尾就幾乎同ist一樣，十足兩者嘅混合體。不過，佢擺明攻打小型汽車市場呢個方針，就珍珠都無咁真嘅……
車展女郎
