雷頌德（Mark）一家三口早前往日本旅行，原定前晚7時許返抵香港，但遇上三號風球兼黑色暴雨，飛機改飛台北，但到達後他們和所有乘客被迫呆坐在悶焗機艙內近五小時，囝囝焗到出疹，結果Mark一家遲了近九小時，昨日凌晨才狼狽抵港！
雷頌德和老婆Jade帶同8個月大的囝囝Jack到日本旅行，原本開開心心的假期，最後變成鬧劇收場。Mark一家三口前日乘坐CX549，下午3時55分由東京飛返香港機場，原定前晚7時45分抵港，但至昨日凌晨4時40分左右，幾經轉折才成功返抵香港，Mark一馬當先推着BB車和行李車出閘，老婆Jade則緊隨其後，兩人均面露疲態。
飛機忽上忽落
Mark甫見記者即遞上一件芝腿三文治，他說：「好肉酸，你哋攞住先。」之後便向記者大吐苦水，他勞氣地說：「原先7點幾班機飛到香港，當時大風大雨，距離跑道約三、四層樓高，點知突然唔落，踩油飛番上天，真係好驚，飛咗20分鐘先通知話飛去台北，我未試過咁大鑊！」
飛抵台北後航空公司安排更加混亂，Mark激動地說：「喺台北等咗四、五個鐘，先畀呢啲嘢（指三文治）我哋食，businessclass喎，等四、五個鐘，出去買飯盒都得！架機又熄晒引擎同冷氣，成機人都鬧晒先開兩道機門，機內又有人咳同打乞嚏，我都好似『領』嘢。Jack就焗到出疹，我想落機同Jack睇醫生，佢又唔畀落。」Mark雖然已準備多一餐奶粉，但在機內留了近五個鐘，奶粉根本就不足夠，之後機員去買奶粉，但又買錯了給六個月大的BB奶粉，Mark批評機員不夠專業。
延遲唔會投訴
最後飛機終可在昨日凌晨起飛返港，但原定凌晨3時20分到達，結果又延遲至4時39分才到港。至於會否向航空公司投訴，Mark稱：「唔會，呢間航空公司我不嬲都撐，因為算係香港人嘅航空公司。」
風雨過後，昨日楊采妮以聯合國兒童基金大使的身份，與20位捐款人在機場出發往中國雲南怒江一帶探訪。她笑說：「𠵱家我啲朋友聽到我要出訪，都會自動自覺準備晒所有用品，所以我都覺得好好彩，身邊有一班朋友咁支持。」
採訪：張俊銘、何慧斯
攝影：娛樂突發組、何慧斯
