梁洛施（Isabella）早前被英皇入稟控告毀約，日前她入稟告英皇，詳列苛刻的合約條文，聲明合約不能執行。身為英皇一姐的容祖兒，昨日爆經理人Mani（霍汶希）近日不開心，自己曾與她把酒談心，又指Isabella的合約糾紛對公司構成打擊，希望她盡快返港交代。
容祖兒昨日由北京返港，隨即到香港仔運動場出席商台饑饉三十活動。對於梁洛施入稟告英皇，指合約條款不合理而拒絕履行，祖兒顯然有備而來，提到Isabella合約內有條款指若然解約，7年內不能當歌手，祖兒竟說：「好正常，做乜無啦啦解約先？而唔係完約。」
應尊重合約
「如當時不滿意可以傾」
祖兒續說：「合約係合約，幾多歲讀幾多書去簽，你都要履行合約嘅責任，如果當時唔滿意，雙方可以傾，但咁多年後，𠵱家先話年紀細而推翻，咁係唔負責任嘅行為。」
對於Isabella指英皇要她履行合約以外極度不合理的行為，祖兒反問：「例如係乜？請佢返香港交代清楚，講嘢好含糊，返嚟交代清楚咁先公平啲。」她又說：「我就冇，唔知佢講乜嘢，合約冇可能條條寫明，好多嘢係靈活、係生嘅，例如啲gathering或者食飯，如果覺得多餘咪唔去。」會否打電話給Isabella？祖兒冷淡地表示沒有對方電話。
問到是否覺得公司抽佣合理？祖兒認為由於公司投資不少金錢和資源在新人身上，故此新人抽佣較多，又謂公司有加人工給她，將來也有再加薪的空間。提到培訓上堂要由新人自行負責費用，祖兒說：「我去美國上堂學跳舞都係自己畀，18蚊美金一堂，好平咋，唔係畀幾十萬去學。」
問到祖兒做新人時的合約會否與Isabella相似？她謂各人情況不同，當年她也是未成年簽約，由媽咪和律師陪同簽的。對於Isabella轟英皇刻薄，祖兒說：「做乜嘢都冇可能冇搭霎，好正常，一個電話交代，你講咗唔會唔畀你，呢件事對公司有打擊。」
條款跨期限
「字眼上唔係個個理解」
問到老闆楊受成有否不開心？祖兒說：「相信Mani（霍汶希）唔開心多啲，佢好畀心機培育佢，我同Mani都有傾呢件事，大家把酒談心。」提到Isabella合約條款在合約期限過後仍然有效，祖兒則稱：「乜嘢意思？唔明白，點會呀？咁奇怪？應該唔會，呢啲字眼上面嘅字，唔係個個可以理解，我真係答唔到，我合約冇呢樣嘢。」
此外，祖兒昨日上台獻唱時，被DJDonald將她與何韻詩的「斷背緋聞」擺上枱，Donald笑問：「大家想聽《搖擺烏克蘭》定《木紋》？」祖兒聞言說：「你唱《搖擺烏克蘭》我咪唱《木紋》。」最後祖兒也有獻唱《木紋》，又謂一早夾定，故此不覺尷尬。
採訪：王連連
攝影：陳慧安