發展商競爭激烈，除咗爭地爭生意，爭得興起連一般比賽都唔放過，勢要爭贏攞彩。噚日中環舉行港鐵競步賽，唔少企業嘅員工都扮鬼扮馬爭出位，希望攞番個獎牌，往年都有參加嘅信和集團，今年玩反串扮經典電影人，男嘅扮性感女神瑪莉蓮夢露；女嘅就扮一代笑匠差利卓別靈（下左圖），最後佢哋攞到「公司隊際賽」，總算攞番個彩。
員工咁落力，管理層都要親自落場支持，咁呢啲咁操勞嘅嘢，梗係要搵啲後生嘅出嚟啦，主席黃志祥乖仔黃永光代父從「賽」，參加「港鐵主席邀請賽」，仲蟬聯亞軍，果然年輕力壯。查實佢過去幾年都有參加，07年攞亞軍，06、05年就攞季軍。