做工程師嘅女生唔多，孭住高級工程師專業資格嘅女電王、中電國際（2380）董事長李小琳，總係畀華華一個硬朗嘅感覺。不過俠女柔情，李小琳除咗每次出嚟見記者都悉心打扮，原來亦愛好文學，仲畫得一手水墨畫。
畫畫文學 根底深厚
上個禮拜，李小琳接受無綫電視台專訪，持有清華大學電力系統及自動化專業工學碩士學位嘅李小琳，喺訪問度提到當年揀呢科嘅原因係好勝，讀大學揀科時，雖然唔係好知工學係乜，但知道考得上嘅都係學習（成績）最好嘅，所以即使對文學同醫科都有興趣，但為咗證明自己成績好，所以報讀工學，又被佢考到喎。
李小琳又話，細細個已經成日跟老竇（即國務院前總理李鵬）去睇發電站同大型工程，對山村上嘅發電站特別好奇，仲問老竇係乜。
女電王唔止成績好，中國文學根底亦相當深厚，平時鍾意畫畫同寫嘢，更係國學大師南懷瑾嘅學生。喺李小琳辦公室內一幅玻璃畫，畫嘅係中國水墨竹畫，原稿出自佢手筆。另外，佢今年初出咗本書講吓管理心得，書名《靜水深流》，題字嘅正係佢老師南懷瑾。
李小琳話最初冇信心出書，「自己唔成熟，第一我還年輕，做企業（資歷）也不長……」，但佢老師話，唔成熟冇關係，都係人生一種經歷，若然令人睇咗有感而發、重新立志，都係一件好事。李小琳就係聽咗老師一席話先肯出書。