中央終於推出救市措施，中港股市應聲而上，不過沈振盈認為，刺激港股向上主要動力來自美股，但A股下跌空間有限。朱紅指，追捧A50中國基金（2823）認購證投資者明顯增加。
沈：沈振盈 朱：朱紅 孫：孫柏文
孫：中央不但不打壓股市，反而出救市措施。
沈：刺激港股升主要動力應該係美股多於國內政策因素。而中央出得政策，我覺得A股再下跌空間唔多。
朱：窩輪投資者仍熱炒A50認購證。A50窩輪街貨量過去一星期都有上升趨勢，反映一批投資者預期A股3000點位置差唔多見底。
孫：A50買唔買得過？
沈：現水平買得過，A股曾經回一回，但未到打和或者倒跌，相對較強，A50都會跟A股走勢，若A股偏軟，回番低少少亦正常。
孫：兩家大陸電訊公司出咗數據，係咪時候買電訊股？
沈：可以買。中移動（941）業績最靚，暫時競爭對佢影響唔大。問題係睇吓電訊業重組方案傾向中電信（728）會出嚟自己發展流動電話嘅業務，呢個會對佢長遠嘅業績利好。
朱：中電信認購證呢兩個星期特別多投資者留意，上星期有一隻中電信嘅認購證宣佈加印。
阿里巴巴前景未明朗
關公：阿里巴巴（1688）上市時走過一轉，近日走勢嚇人，仲諗住佢會跌穿12蚊。
沈：佢業務模式係好，𠵱家亦賺錢，但互聯網冇乜入場門檻，賺到錢其他行家就會同你爭，𠵱家PE（市盈率）落番五十幾倍，如果出埋業績真係有倍數增長嘅話，PE落番廿幾倍先合理。
朱：當時炒完上市後已冇人問佢嘅認購證。
沈：當日出put輪我一定會捧場。
關公：我12.3蚊入咗喇。
沈：都係一句──忘記它啦！咁多股票好揀，梗係取易不取難。
大埔關公個案
買入價：12.3元
目標價：13.6元
止蝕價：11.8元
時期：一星期